Shillong, Jylliew 01: Ka Elina Svitolina ka la sei madan ïa ka jingïalehkai kaba itynnad bha ban pynsngewsih kthang ïa ka Jasmine Paolini kaba la rung final ha u snem ba la dep ha ka jingïakhun kaba la neh lai tylli ki set bad poi sha ka French Open Quarter Final.
Katei ka thei ïalehkai tennis na Ukraine kaba shah thup kyrdan ba 13 ka la lah ban khur ïa ka jingjop da 4-6 7-6 (8-6) 6-1 pyrshah ïa ka thei ïalehkai na Italy kaba shah thup kyrdan ba saw.
Hadien ba ka Svitolina ka la rung sha ka Quarter Final ha ka Roland Garros ha ka sien kaba san, ha kaba kan ïakhun pyrshah ïa ka lahduh ba ïada ïa ka burom ka Iga Swiatek lane ka Elena Rybakina.
“Ngam pat lah ban poi pyrkhat ba kane ka jingïalehkai ka la pyndep ïa ka lynti jong Nga. Nga dang sngew ba ka khlieh jong Nga ka don ha ka jingïalehkai bad ha ka jingïakhun kaba jur” la ong ka Svitolina.
“Ka long ka jingïalehkai kaba jwat, ka Jasmine ka la ïalehkai bha. Ka long kaba jwat ïa Nga hynrei Nga kmen ba Nga skhem, Nga ïakhun tad haduh ka khyllipmat kaba khatduh bad hangne mynta Nga don ha ka wat ïakhun kaba bud.”
Ka Paolini ka la ïoh mad ïa ka snem kaba seisoh bha ha u 2024, ha kaba ka la poi final ha ka French Open bad Wimbledon bad la ñiew ïa ka kum ka nongïakhun na ka bynta ka nam lahduh ha Paris.
