Shillong, Rymphang 22: Ka Royal Cricket Club ka la pynliem noh da 6 wiket ïa ka Sputnik Cricket Club ha kawei na ki jingïalehkai ka lympung Shillong Cricket League Super Division 2026 jong ka Shillong Cricket Association (SCA) kaba la long hynne ka sngi U Blei ha Polo.
Haba tied nyngkong hadien ba jop ïa ka jingkynting pisa (toss) ka Sputnik CC, ka la buh ïa ka thong kaba 209 ron haduh kaba kut ki 45 ober bad khyllem 8 wiket, ha kaba u Amiangshu (56 ron naki 115 bol) bad u Chaman Pushp (44 ron naki 62 bol) ki la long ki nongtied kiba kongsan tam. U Reshabh Dipak jong ka Royal CC u la khur 2/22 naki 8 ober, katba u Abhishek Kumar u la khur 2/36 naki 9 ober.
Haba beh ïa ka thong, ka jingnoh synñiang kaba khraw jong u Rajesh Tati (69 ron naki 53 bol) bad u Raj Biswa (53 ron naki 41 bol) ka la ïarap ïa ka Royal CC ban kynjoh ïa ka 210 ron tang haki 32.5 ober da kaba khyllem tang 4 wiket. Watla u Amiangshu u la khur 3/33 naki 8 ober hynrei ka Sputnik CC ka la mad ïa ka namrem namar ba kam shym la lah ban khanglad bad pynkhyllem ïa baroh ki wiket ba dang sah jong ka Royal CC kaba la jop da 6 wiket.
Na ka bynta ka jingnoh synñiang ha baroh ki liang, u Swastic Chettri (kamai 47 ron ha ka tied bad khur 1 wiket ha ka boling) u la ïoh ban khur ïa ka khusnam Player of the Match.
Haba phai sha ka jingïalehkai kaba la long ha ka sngi Saitjaiñ, la sakhi ïa ka Rangkynsai Cricket Club kaba la khur ïa ka jingjop kaba khraw da kaba pynliem ïa ka New Friends Union haduh 318-ron.
Hadien ba jop ïa ka jingkynting pisa (toss), ka Rangkynsai ka la tied haduh 448 ron bad khyllem 7 wiket haki 45 ober, ha kaba ar ngut ki nongtied ki la kynjoh ïa ka spah ron, kynthup ïa u Joydeepan Deb (150 ron naki 104 bol) bad u Shavian Blah (121 ron naki 78 bol). Dei tang u Bharat Gurung (3/68 naki 9 ober) uba la kham seisoh ha ka bol na ka bynta ka NFU.
Nangta ka Rangkynsai ka la pynkhyllem noh ïa baroh 10 ngut ki nongtied jong ka NFU tang na ka bynta 130 ron haki 37.4 ober, ka jingnoh synñiang kaba kham khraw ka la wan tang na u Kevin Christopher (78 ron na ki 101 tylli ki bol).
Napdeng ki nongkawang bol jong ka Rangkynsai, u Adarsh Joshi u la khur 4/14 na ki 5 ober, katba u Ram Gurung u la khur 3/25 na ki 6 ober, katba ïa ka khusnam Player of the Match la khur da u Joydeepan Deb uba la kamai 150 ron.
