Wahïajer, Nailur 14: Ka Red Mark FC kala jop da 4-2 kol ïaka Mukhla Wahchnong haka jingïakhun ba la long ha ka Sngi Saitjaiñ (14 tarik – Nailur) haka lympung “8th Invitation Knock-out Football Tournament” bala pynïaid da ka Wahiajer Sport Cultural Club, West Jaiñtia Hills District ha madan Waiajer Multi Sports Complex.
Ka Red Mark FC ka la ïoh ban lamkhmat lypa haduh 3 kol ha ka kylla step, ha kaba u Sngiwan pynsuk Kurbah u la pynkhih ar kol ha ka 33 bad 38 minit, bud sa ka kol na u Wansiedor Nengnong haka minint ba 40, nangta ka kol kaba khadduh na u Angelus Biam haka minit ba 78.
Na ka liang jong ka Mukhla Wahchnong kaba la pyrshang shitom ban pynphai ïa kitei ki kol ka la ïoh ban thep tang 2 kol ba la wan lyngba u Chandame Suna (53 minit) bad na u Riben Talang (80+1 minit).
Ïa ka nam rangïalehkai ba kynsai lane Man of the Match ha kane ka jingïakhun la ïoh khur da u Wansiedor Nengnong, player ka Red Mark FC.
La pyntip ba ka jingïakhun ba bud ha kane ka Lah Sngi U Blei (16/09/2024) kan long hapdeng ka Friend United pyrshah ïa ka Monjurlang FC haka por 2 shiteng nohphai sngi.
