Pynliem ka Raid Nongpoh ïa ka Shillong Lajong FC ha ka jingïalehkai paralok ha madan NSCA Pahamsyiem

Nongpoh, Nailar 24: Ka kynhun ïalehkai jong ka Raid Nongpoh mynta ka sngi kala lah ban pynliem ïaka kynhun ïalehkai ba paw ka jylla ka Shillong Lajong FC haka jingïalehkai paralok bala pynlong da ka Raid Nongpoh da ka jingthmu ban pynmih pisa ban kyrshan ïaka skul Nomiwell Secondary School kaba don ha Nongpoh.
Haba phai sha ka jingïalehkai ha katei ka sngi ki rangïalehkai na baroh 2 ki kynhun kila ïalehkai bha naduh ba sdang ka kylla step haduh ka kylla miet, hynrei hapdeng ka jingïakhun kaba jur ki rangïalehkai jong ka Raid Nongpoh ki la ioh ban pynkhih nyngkong ïaka jar haka kylla miet bad tang hadien kumba katto katne minit ka kynhun jong ka Shillong Lajong kila ioh ban pynphai noh ïa katei ka shi kol bad haduh ba kut ka kylla miet ka jingïakhun kala kut noh hapdeng ka jingïakhaid da mar 1-1 kol.
Hadien ka jingïakhaid naka liang ki referee bad ki bor pynïaid kila rai ban pynshut noh da ka tie breaker bad dei haka jingïashut tie breaker bad ka Raid Nongpoh kala lah ban pynliem syndon ïaka kynhun jong ka Shillong Lajong da 5-3 kol.
Naka liang ki bor pynïaid kum ka jingsah jingkynmaw kila aiti ruh da ki momentous sha baroh ar kynhun bala wan ruh ban sakhi da u Bah Linus Lyngdoh Lyngdoh ka Raid Nongpoh, Boby L Nongbet DSO ka Ri-Bhoi District bad kiwei kiwei ki riew rangbah ryngkat ki longsan mansan jong ka Raid.