Shillong, Rymphang 19: Ka kynhun ïalehkai kriket jong ka Nagaland ka la ïohrah ïa ka burom kum ka lahduh ha ka U-23 men’s Col CK Nayudu Trophy Plate Group hadien ba ka la pynliem noh ïa ka Meghalaya da 7 wicket ha ka jingïalehkai kaba la long ha Sovima, Nagaland, hynne ka Sngi.
Kane ka jingïakhun final hapdeng kine ki arliang ka la sdang naduh hynnin ka Sngi U Blei, bad la sdang tied nyngkong daka Meghalaya kaba la shah pynkhyllem noh da tang 108 ron katba ka Nagaland ka la tied 50/1 shuwa ban pynkut ïa ka sngi.
Hynne ka sngi, haduh 22 wicket ki la shah pynhap – ka Nagaland ka la shah pynhap lut da tang 109 ron, hynrei ka Meghalaya ka la shah pynkut noh da tang 53 ron ha ka inning tied kaba ar, ïa kaba ka Nagaland ka la pyndep ban tied da kaba hap tang 3 wicket.
Dei lyngba u Mughavi Sumi u ba la kyrshan borbah ïa ka kynhun ba ïalehkai hala ïing, hadien ba u la ïarap ïa ka Nagaland ha ka inning ba nyngkong da 62 khlem shah pynhap (not out).
Na ka liang jong u Manish Sharma u la khur biang san wicket (5/22 naki 16 overs) na bynta ka Meghalaya katba u Bipin Kumar Ray u la khur 2/33 naki 8.5 over. U Abhishek Kumar u khlem shym la ïoh ban khur wicket, bad pyndep ïa ka final da tang 1/43 naki 9 over.
Ka Nagaland ka la donkam tang 24.5 over ban pynhap ïa baroh 10 ngut ki wicket ka Meghalaya. Tang arngut ki rangïalehkai ka Meghalaya kiba la kynjoh sha ka phew ron – u Mrityunjay Bharali bad u Bipin, baroh arngut kiba la kamai mar 11 ron. U Neizekho, u la khur 6/15, katba u Hem u la khur 4/24.
Na ka liang jong ki rangkawangbol ka Meghalaya ki la ïakhun tyngeh ban ïada ïa katei ka ron watla ka dei ka ron kaba khyndiat, bad napdeng kine kiba la ïoh khur wicket ki long u Manish (1/24) bad u Bipin (2/24) hynrei kane kam shym la biang ïa ka kynhun ban khur ïa ka namjop.
Ha kane ka sngi la ïadonryngkatlang u President- ka Meghalaya Cricket Association- u Nababrata Bhattacharjee u ba la aiti ïa ka BCCI Championship Trophy sha ka Nagaland. Baroh ar, ka Nagaland bad ka Meghalaya, da kaba ïohrung sha ka final ha ka Plate Group, ki la pynthikna ïalade ban ïoh ïakhun ha ka Elite Groups na bynta ka samoi ban wan.
“Ai khublei ïa ka Nagaland Cricket Association kaba la ïohrah ïa ka namlahduh ha ka BCCI’s U-23 Plate Group da kaba pynliem ïa ka Meghalaya Cricket Association ha ka jingïakhun final mynta ha Sovima,” la ong u Bhattacharjee. “Ka long ka burom ïa nga ban aiti ïa ka BCCI Championship Trophy sha kane ka kynhun lahduh. Ha kaba kut jong ka sngi, ka long ka jingjop ïa NECDC,” la bynrap u Bhattacharjee.
Ka NECDC (North East Cricket Development Committee) ka dei ka synjuk ïatreilang jong hynriew tylli ki kynhun jong ka thaiñ- ba kynthup ïa ka Arunachal Pradesh, Manipur, Meghalaya, Mizoram, Nagaland bad ka Sikkim – kiba la long ki dkhot ba pura jong ka BCCI. U Bhattacharjee u la long kum u Convener jong ka NECDC.
Watla ka kynhun ka la wan ha ka kyrdan ba ar, hynrei ym lah ban knieh pat ïa ka nam ba ka Meghalaya ka la ïoh, da kaba jop baroh hynriew sien lynter ki jingïalehkai shuwa ban jam sha ka final. U Manish u la long ka nuksa da kaba khur haduh 45 wicket naduh ba sdang ka lympung, katba u Abhishek u la pyndep da 40 wicket.
