Pynliem ka MLP da 3-2 ïa ka Mawkasiang; bteng u Pynshailang ban pynkhihjar

Shillong, Naiwieng 30: Ka Meghalaya Police ka la hap ban ïakhun tyngeh ban wanphai nadien shuwa ba kan khur ïa ka jingjop da 3-2 kol pyrshah ïa ka Mawkasiang ha kawei naki jingïalehkai jong ka Group A ha ka SSA Champions Cup 2025 kaba la long ha ka sngi Saitjaiñ (29 tarik Naiwieng, 2025) ha madan First Ground-SSA Stadium, Polo.
Ka Mawkasiang ka la ïoh ban lamkhmat nyngkong lyngba u Robertson Khongriah (34′) hynrei ka MLP ka la wanphai lyngba ki ar kol jong u Pynshailang Lyngkhoi (47′, 53′). Nangta u Jonathan Kharbani (64’) u la pynïakhaid ïa ka kol na ka bynta ka Mawkasiang hashwa ba u Everywell Khongjee (81’) un pynkhih ïa ka namtam kum ka kol jong ka jingjop. Hadien kane, ka MLP ka la hap ban ïalehkai da tang 10 ngut haduh kaba kut hadien ba u Niawkorlang Kyndiah u la ïoh ïa ka yellow card kaba ar.
Lah ban kdew ba ka MLP kam shym la dei satia ban mad haduh katne katne ka jingeh ha kane ka jingïakhun haba nujor ba ka Mawkasiang kadei ka klob ïalehkai ha ka U-20 Fourth Division (kaba ki la jop) mynta u snem, katba ka kynhun jong ka MLP ka dap da ki nongïalehkai kiba la rangbah bad shemphang bha kiba la shah rem tang shisien ha ka First Diviison 2025. Hynrei ka Mawkasiang ka la shim kabu ïa ka jinglong samla jong ki da ka jingïalehkai phutbol kaba stet bad kaba jur bha shakhmat. Ki san ngut ki rangïalehkai kiba la shim wai (on loan) da ka klob na ka bynta ka Champions Cup ki dei baroh na ka Mawlai kaba ïakhun ha ka Shillong Premier League, kumta ym tang ba ki long ki rangïalehkai kiba tbit hynrei kidei kiba nang bha ban ïalehkai kum ka kynhun.
Kane ka jingïalehkai pyrshah ïa ka Mawkasiang ka la pynlong ruh ïa ka MLP ba kan shah lamkhmat ha ka kylla step ha ka sien kaba ar hadien ba ka la jia ruh ha ka jingïalehkai kaba nyngkong pyrshah ïa ka Umlyngka shuwa ban wanphai da ka jingjop ha ka kylla miet.
U Pynshailang uba thep saw kol ha katei ka jingïalehkai ba nyngkong u la bynrap sa ar kol ban kyntiew ïa ka jingkheiñ jong u sha ka 6 kol ha ki ar tylli ki jingïakhun, kaba ïaryngkat bad u Riborlang L Lyngkhoi jong ka Shillong Lajong.
Haba phai sha ka jingïakhun, ka Mawkasiang ka la pynurlong ïa ka kol kaba nyngkong na ka free kick kaba la shut da u Robertson, ha kaba u nongapkol ka MLP u Basuklang Nongsiej um shym la lah ban leh eiei ban ïada.
Hynrei ha ka kylla miet ka MLP ka la mih kum ka kynhun kaba kham pher, ha kaba u Pynshailang u la pynkhihjar tang hapoh 2 minit ba la sdang biang ïa ka jingïalehkai shuwa ba un thep ïa kaba ar da kaba shu pyndei tang tiak ïa ka bol pashat jong u Aldrin Ramsiej.
Ka Mawkasiang, kaba ïakhaid ha ka jingïalehkai kaba nyngkong pyrshah ïa ka Mylliem Lum, ka la jubab da kaba pynïakhaid biang sa shi sien ïa ka jingïakhunlyngba u Jonathan shuwa ba u Everywell un thep ïa ka kol kaba lai na ka bynta ka MLP.
Ka jingïoh yellow card kaba arsien jong u Niawkorlang ka la long ka jingktah ïa ka MLP hynrei ki la ïai bteng ban bat skhem ïa ka jingïapher kaba tang shi kol haduh kaba kut.
Ka jingjop ka mut ba ka MLP ka la kiew ha khlieh duh ha ka Group A da kaba kamai 6 poiñ. Ka ïaryngkat bad ka Langsning ha ka jingïoh kamai poiñ bad jingïapher kol (+4) hynrei ka MLP ka la thep bun kol (7 la 4 kol). Ka Mawkasiang bad ka Mylliem ki la khur mar 1 point katba ka Umlyngka ka dang sah khlem pat kamai poiñ.
Ar tylli ki jingïalehkai SSA Champions Cup ha kane ka sngi Nyngkong. Ha ka Group A ka Umlyngka kan aireng pyrshah ïa ka Mylliem Lum ha ka por 1 baje nohphai sngi bud sa ka jingïakhun jong ka Nongkseh pyrshah ïa ka Mawlynrei ha ka por 4:30 baje jan miet ha ka Group B.