Pynliem ka Meghalaya ïa ka Manipur ban wan hakhliehduh na ka Group A

Shillong, Risaw 02: Ka kynhun ïalehkai kriket ki thei ka jylla Meghalaya ki la lah ban pynliem ïa ka Manipur da 17 ron ha ka Sngi Balang (02 tarik Risaw) ban pynkut kum ka lahduh jong ka Group A bad ban rung sha ka wat ïakhun semi final ha ka 1st Senior Women’s Interstate Friendship T20 Tournament 2024 jong ka North East Cricket Development Council, ha madan kriket Pahamsning kaba ha Ri-Bhoi.
Ha ka jingïakhun kaba bud jong ka Group B, ka Sikkim ka la pynliem ïa ka Mizoram ban jop da 9 ron. Ka Sikkim kaba la jop ruh ïa ka Nagaland ha ka Sngi Hat Majai, kumta ka la la lah ban long lahduh jong ka group. Ka Nagaland ka la wan kyrdan ba ar na ka Group B (ka la pynliem ïa ka Mizoram ha ka jingïakhun ba nyngkong) bad ka Manipur ka la wan ba ar na ka Group A (ka la jop ïa ka Arunachal Pradesh ha ka Sngi Hat Majai).
Ha ka jingïakhun, ka Meghalaya ka la jop ïa ka toss, bad ka la jied ban tied nyngkongha kaba ka kynhun ka la lah ban kynjoh 97 ron haduh kaba kut jong ka 20 over, bad shah pynhap 5 ngut. Ka kynhun ka la shah pynhap lai wicket ha ka por ba dang kynjoh 13 ron shuwa ba ka Neha Hajong (18 ron) bad ka Luiza Tamang (32 ron khlem shah pynhap) ki la ïarap 45 ron shuwa ban hap wicket ba saw. Hadien ba shah pynhap noh ïa ka Neha, ka Daiaka Warjri ka la tied 14 ron kaba ïarap ïa ka Meghalaya ban kynjoh duna ïa ka 100 ron. Ha kane ka jingtïalehkai, lai ngut ki thei kawangbol ka Manipur ki la pyndep mar katjuh ka jingkheiñ (khur wicket bad jingshah kamai ron) – kine ki kynthup ïa ka RK Linthoingambi Devi (1 wicket shah tied 13 ron), Chingkheileima Chanu Mangsatabam (1/13) bad ka Monica Devi Ningthoujam (1/13).
Ha ka pali tied, tang arngut ki thei ïalehkai ka Manipur kiba la lah ban kynjoh sha ka phew ron – ka Monica (24) bad ka Kalpana Devi Keisham (17 not out) – ka jingïatreilang hapdeng nongtied ka Manipur kam shym la long kaba skhem bad ha kaba kut baroh ki wicket ki la shah pynhap lut ban kynjoh tang 80 ron na ki 18.4 over. Ka Daiaka ka la khur 2 wicket- shah tied 26 ron, katba ka Ruby Chettri (1/5), Debasmita Dutta (1/9) bad ka Ajima Sangma (1/13) ki la ïoh ban khur mar shi wicket.
Da kane, ka Meghalaya ka la kylla long ka kynhun kaba nyngkong ban khur jingjop ha kane ka lympung haba shimti ban tied nyngkong bad nangta bud sa ka Sikkim hadien.
Ha kawei pat ka liang, ka Sikkim, ka la shah pyntied nyngkong hadien ba ka Mizoram ka la jop ïa ka toss. Ka jingïakhun kaba duna ha ka jingkamai ron la sakhi ïa ka Sikkim kaba la shah pynkut da 72 ron, hap 7 ngut naki 20 over, ha kaba ka Tshering Ongmu Lepcha (20) bad ka Anjeel Lepcha (18 not out) ki la lah ban seisoh ha ka tied. Ka Mamta Rai ka la khur 3/11 na bynta ka Mizoram.
Haba sdang beh ka jingkyrmen ka kham noh sha ka Mizoram, ha kaba ka Felfeli Pautu ka la tied 14 ron bad ka P Vansangzuali ka la khyrwit 22 ron, hynrei ka jingshah pynhap noh kine ar ngut ka la pynsuki ïa ka lad kamai ron bad ka kynhun ka la shah khanglad noh da tang 63 ron na ki 20 over, bad shah pynhap 8 ngut. Ka Purni Maya Gurung ka la long kaba seisoh tam napdeng ki thei kawangbol da kaba khur 3 wicket bad shah tied tang 8 ron naki 4 over.
Baroh ar tylli ki jingïakhun semifinal kin long mynta ka Sngi Palei. Ka Meghalaya kan aireng pyrshah ïa ka Nagaland ha ka por 9 baje mynstep, bud sa ka jingïakhun hapdeng ka Sikkim pyrshah ïa ka Manipur ha ka por 12 shiteng mynsngi.