Shillong, Rymphang 05: Ka Malki SC ka la lah ban pynliem noh da 28 ron ïa ka Young Guns ha ka lympung ‘Shillong Cricket League First Division 2024-25 ba la pynïaid da ka Shillong Cricket Association, ba la long hynne ka sngi Balang.
Ha ka jingïalehkai ka Malki SC ka la shimti ïa ka pali tied ba nyngkong ha kaba ka la lah ba kan kamai 178 ron shuwa ban khyllem baroh 10 wiket naki 38.5 over. U Nick Dann u la lah ban tied 56 ron naki 48 bol, nangta u Sylvester Mylliempdah u la kyrshan da kaba kamai 39 ron naki 54 bol.
Haba phai sha ki rangkawang bol ka liang pyrshah, u Kenny Wann (8 over: shah tied 16 ron) bad u Mewankitbok M kharpuri (8 over: shah tied 30 ron) ki la ïoh ban khur mar 3 wiket.
Haba shimti ïa ka pali tied ka Young Guns kam shym la lah satia ban kynjoh sha ka thong, ha kaba ka la kamai 150 ron bad khyllem baroh 10 wiket naki 36.2 over. U Kenny Wann (44 ron naki 54 bol) bad u Manthan Dey (40 ron naki 42 bol) ki dei kiba la kyrshan khan bun ron ïa ka kynhun watla ka kynhun ka mad ïa ka namrem.
Haba phai sha ki rangkawang bol jong ka Malki SC u Aiborlang Wahlang u la khur 3 wiket naki 8 over bad shah tied 20 ron, nangta u Sylvester Mylliempdah u la khur 2 wiket naki 8 over bad ailad tang 29 ron kaba la ïarap borbah ïa ka Malki SC ban jop da 28 ron. ïa ka nam Player of The Match la khur da u Nick Dann uab la kamai 56 ron naki 48 bol.
