Shillong, Kyllalyngkot 23: Hadien ba mad lynter ar tylli ki namrem ha ki jingïalehkai ba ladep, hynne ka sngi Palei ka Laitkor SC ka la lah ban wanrah jingkmen ïa la ki nongkyrshan da kaba pynjem-khnap ïa ka Nongthymmai SC haduh 4-0 kol ha ka lympung OC Blue Shillong Premier League 2024 ba la long ha madan First Ground-SSA Stadium, Polo.
Ha kane ka jingïalehkai ka Laitkor ka la ïoh ban lamkhmat lypa haduh 3 kol tang ha ka kylla step shuwa ba kan pyn-khih ïa ka kol kaba saw ha ka kylla kaba ar. Kiba la pynkhih-jar ha kane ka jingïalehkai ki long u Rikmenlang Nongrum (3’), Risuk Malngiang (24’), Sandy Kharkongor (37’) bad u Fridison Wanniang (62’).
Haba phaidien, ka jing-ïakhun 1st leg ha ka 4 tarik Naiwieng hapdeng kine ki arliang la sakhi ba ka Nong-thymmai ka la jop da 3-1 kol. Da kane ka namjop ka Laitkor ka la ïoh ban kamai 13 poiñ, ban jam sha ka kyrdan ba hynriew ha ka miej. Katba ka Nongthymmai kaba don ha ka kyrdan ba 9 ka dang sah ha ka thup shah sloit (relegation zone) da kaba ïoh tang 7 poiñ. Bad mynta ki la thep haduh 20 kol tang ha ki san tylli ki jingïalehkai ba ladep.
Ka jingïoh pynkhihjar ka la urlong kham kloi tang hadien 3 minit lyngba u Rikmenlang. Ka kol kaba bud la thep da u Risuk na ka free kick kaba la ïaid nalor ka kynroh bak jong ka Nong-thymmai. Ha ka jingpyrshang ban khanglad ïa ka bol u Banshngainlang Masynting (rangapkol) u la mynsaw ka khlieh bad la hap ban bujli pat da u Akash Thapa.
Ka Laitkor ka la pynskhem ïa ka jingkyrmen ban khur pura ïa ki lai point khyndiat shuwa ban kut ka kylla step lyngba ka kol u Sandy.
Ka Nongthymmai ka la ïoh katto katne ki kabu – watla ka la jop tang 2 sien, hynrei ki rangïalehkai jong ka ki la ïoh ban pynkhihjar barabor – hynrei mynta ka kynti kim shym la lah satia.
Khatduh eh u Fridison u la thep tang kawei ka kol ha ka kylla miet. Haduh kane ka por ki nongïalehkai jong ka Laitkor ki la don ha ka jingkmen kaba pura hadien ar tylli ki jingshah rem ba ka la mad da tang 1-0 kol ha ki kynhun ba don hakhmat eh, ka Mawlai SC bad ka Shillong Lajong FC.
Mynta ka sngi Thohdieng (24 tarik Kyllalyngkot) kin don ar tylli ki jingïalehkai. Kata ha ka por 11 baje mynstep ka Lajong kan aireng pyrshah ïa ka Sawmer SC bad ha ka por 2 shiteng nohphai sngi, ka Mawlai pyrshah ïa ka Ryntih FC. Baroh ar kynhun, ka Lajong bad ka Mawlai ki la jop ïa ki liang pyrshah jong ki da 4-1 kol ha ka first leg.
