Pynliem ka ka Laitkyrhong ïa ka Mawlali, Thynroit ïa ka Laitlum bad Thangsning ïa ka Mawpyrshnong ha ka Mawkynrew Cup

Shillong, Risaw 02 : Ka lympung ïalehkai Mawkynrew Cup ha ka sngi Saitjaiñ jong ka taïew ba lah dep la ïoh ban pynlong ki jingïalehkai jong ka Zone 1 ha madan Thangsning.
Ka Laitkyrhong FC ka la khur jingjop da kaba pynliem da 1-0 kol pyrshah ïa ka Mawlali SC ha ka jingïalehkai kaba nyngkong, bad ïa katei ka shi kol la thep da u Everest Rynjah ha ka minit ba 58 lyngba ka penalty. Ha ka jingïalehkai kaba ar jong katei ka Zone 1 ka Thynroit SC ka la pynliem da 1-0 kol pyrshah ïa ka Lailum SC ba la thep da u Arphrangstone Warlarpih ha ka minit ba 36.
Katba ha ka jingïalehkai kaba lai bad kaba khadduh jong katei ka sngi, ka Thangsning SC ka la pynliem da 3-0 kol pyrshah ïa ka Mawpyrshnong FC. Ïa kitei ki lai kol la thep da u Aipynbha Ryndong ha ka minit ba 9, u Flemingstar Kharumnuid ha ka minit ba 15 bad u Pherlystar Nongspung ha ka minit ba 47. Ha katei ka sngi kadei ruh ka jingïalehkai kaba khadduh jong ka kylla ba nyngkong (1st round) jong ka Zone 1.