Mawkyrwat, Naiwieng 18: Ka Benris Football Club ka la lah ban pynliem noh da 2 – 0 kol ïa ka MLP Football Club ha ka lympung ïalehkai kynjatbol ba la tip kum ka XVII Mawlangwir Invitation Football Tournament 2024 ba la pynïaid da ka Mawlangwir Sports Club hapoh ka madan Rowell Lyngdoh Stadium Mawlangwir, South West Khasi Hills District ha ka sngi Saitjaiñ (taïew ba ladep).
Ha ka jingïalehkai jong ka kyllastep ka Benris Football Club ka la ïoh ban thep ïa ka shi kol na u Carl Lam ha ka minit kaba 38. Nangta, ha ka jingïalehkai kyllamiet ruh ka Benris FC ka la ïoh biang ban thep sa ka kol kaba ar na u juh hi u ‘rangïalehkai kata na u Carl Lam ha ka minit kaba 75.
Kumta haduh kaba kut jong ka jingïalehkai, na ka liang ka MLP FC ruh kam shym la lah ban pynphai ïa ki kol bad ka la kut noh da kaba ka Benris FC ka la tam noh da 2 kol ïa ka MLP FC.
Lah ban kdew ruh ba ha kane ka lympung ïalehkai la wan sakhi ruh da ki hajar ngut ki paidbah ‘riew ieit phutbol ha kaba ki la ai ruh ka jingkyrshan ïa la ki jong ki jong ki kynhun namar ka Benris FC ha kane ka lympung ka la wan rah da ki ‘rangïalehkai kiba dei na kiwei pat ki Ri.
U kongsan ha katei ka sngi u dei u bah Charlin Wanniang, Assistant Executive Engineer ka PWD (Roads) Dangar Sub Division, Mawsynram uba la shim ruh ïa ka bynta ban ai jingkren ha ryngkat ka jingkynjat ïa ka bol bad pynher ïa ka lama kaba long kum ka dak jong jingplie pyrda XVII Mawlangwir Invitation Football Tournament jong u snem 2024, ha ryngkat ka jingïadonlang u bah N. Wanniang, Myntri Shnong Mawlangwir, u bah Kynpham V. Kharlyngdoh, ki nongkitkam jong ka Mawlangwir Sports Club lem bad kiwei de ki ‘riew rangbah.
Ka jingïalehkai kaba bud kan long hapdeng ka Ehrngiew Football Club pyrshah ïa ka Nongbri Football Club ha ka por 1:30 baje nohphai sngi jong ka 23 tarik u ‘Naiwieng, 2024.
