Mawkyrwat, ‘Naiwieng 18: Ka Pynnoh Riwar Football Club ka la lah ban pynliem noh ïa ka Rangjadong Sports Club da 3 – 0 kol mynta ka sngi 18-11-2024 kaba dei ka jingïalehkai Quarter Final ba nyngkong jong ka Golden Jubilee Celebration Football Tournament 2024 ba la pynïaid da ka Nonglang Sports Club ha madan Pyndenïewlyngdoh, South West Khasi Hills District.
Ka jingïalehkai ha kane ka sngi ka la long kaba itynnad bha naduh kaba basdang haduh ban da kut ka regular time 90 minit. Namarkata, ha ka jingïalehkai jong ka kyllastep ka Pynnoh Riwar FC ka la ïoh ban pynkhih jar ha ka minit ba 11 lyngba u Manbha Iawphniaw bad haduh bakut jong ka kyllastep ka Pynnoh Riwar FC ka tam 1 – 0 kol.
Haba wan phai sha ka jingïalehkai jong ka kyllamiet ka Pynnoh Riwar FC ka la ñion tyngeh biang bad ka la ïoh biang ban thep kol biang sa ka kol kaba ar lyngba ka jingïoh ïa ka penalty ba la kynjat hi da u Manbha Iawphniaw kaba dei ha ka minit ba 56 bad ka Rangjadong SC ruh ka la pyrshang tyngeh ban ïoh ban pynphai tangba ka jingkhlaiñ jong ki ‘rang ba ap nadien jong ka Pynnoh Riwar FC ha kaba ki la khanglad ïa ki kabu jong ki ‘rangïalehkai jong ka Rangjadong SC.
Kumta, ka Pynnoh Riwar FC ka la ñion tyngeh biang bad ka la thep biang sa ka kol kaba lai lyngba u Chesterpaul Lyngdoh ha ka minit ba 82 bad kumta haduh bakut jong ka kyllamiet, ka Pynnoh Riwar FC ka la jop noh pyrshah ïa ka Rangjadong SC da 3 – 0 kol.
Nangta, ïa ka nam u ‘rangïalehkai jong ka lympung mynta ka sngi la ïoh rah da u Manbha Iawphniaw jong ka Pynnoh Riwar FC uba la thep 2 kol.
Ka jingïalehkai kaba bud kata ka Quarter Final ba ar kan long ha ka 20-11-2024 sngi Balang hapdeng ka PNR Jr. FC pyrshah ïa ka Ïawpaw Football Club ha ka por 2 baje noh phaisngi. Kane ka long ka kyrwoh na u Secretary Nonglang Sports Club, u bah Kordorlyne Kharlyngdoh.
