Pynliem ka Bengaluru da 2 kol ïa ka NorthEast United ha ka ISL

Shillong, Rymphang 21: Ka NorthEast United FC ka la mad biang ïa ka nam rem hala ïing ha kaba ka la shah pynliem da 0-2 kol ha ka Bengaluru FC ha ka jingïakhun kaba la long ha JN Stadium, Shillong ha ka lympung ïalehkai jong ka Indian Super League 2024-25.
Ka Bengaluru ka la pyndonkam ïa ka jingtbit jong ka da kaba ïoh ban thep ar sien na ki saw tylli ki kabu ksiar ba ka la ïoh. Lah ban kdew ba ka NorthEast United ka la long kaba kham trei shitom ha kane ka jingïalehkai, da kaba ïoh pashat 25 tylli ki bol kiba long ka jingma haba nujor ïa ki 10 tylli ba la ïoh da ka liang pyrshah, hynrei ka kynhun jong u Gerard Zaragoza ka la khur pat ïa ka namjop ha kaba khatduh, ban jam sha ka kyrdan ba saw ha ka miej ryngkat ki 34 poiñ naki 21 sien ïalehkai, katba ka NEUFC ka la poi sha ka kyrdan ba san da 32 point.
Lah ban kdew ba kane kadei ka namrem kaba ar sien lynter ïa ka NEUFC ha Shillong; ka la mad ruh ïa ka namrem ha ka Mumbai City FC da 2 kol ar taïew mynshwa.
Haba bishar ïa ka jingïalehkai, lah ban ong ba ka Bengaluru ka la tei ïa ka rukom lehkai kaba khlaiñ naduh kaba sdang, da kaba tehlakam ïa ka bol bad ban pynrung lyngba ki rangapdien jong ki NEUFC da kaba suk. Ki la shim ïa ka bol, da kaba pashat ïa ka na pdeng sha ki liang ba shadien bad pynpra ïa ki rangapdien jong ka NEUFC.
Ka jinglah jong kane ka kynhun ban pynpra ïa ki rangapdien jong ka NEUFC ka la plielad ïa u Ryan Williams ban pynkhih ïa ka kol kaba nyngkong tang hadien 3 minit ba ïaid ka kylla step.
Katei ka shi kol ka ïeng skhem haduh kaba kut jong ka kylla step bad ka la shimpor tad haduh ka minit kaba 81ba ka Bengaluru kan ïoh ban pynjlan da 2 kol lyngba u Alberto Noguera kaba la pynthikna ïa ka kynhun ban khur pura ïa ki lai point.