Pynkynriah ne pynjlan shwa ïa ka eksam CUET mynta u snem, kyrpad u Conrad ïa ka Sorkar pdeng

Shillong, Jymmang 11 : U Myntri Rangbah ka Jylla Conrad K Sangma, ula thoh da ka shithi sha u Myntri ka Ministry of Education ka Sorkar Pdeng u Dharmendra Pradhan ban kyntu pynkynriah shwa lane pynjlan ïa ka eksam CUET na ka bynta ki samla pule Meghalaya hadien ba ka la mih bun ka jingud jingnam ba ki hap ban leit thoh eksam sha kylleng ki jylla.
Ha ka shithi u Myntri Rangbah u la kyrpad ïa u Myntri ka sorkar pdeng ba un bthah ïa ka National Testting Agency ba kan bishar biang bad ban pynngat thoh eksam Common University Entrance Test (UG), 2025 ïa ki samla pule ka Meghalaya ha la ka jong ka Jylla.
Kane ka jingkyrpad na u Myntri Rangbah kadei hadien ba bun ki samla pule ka jylla ki la mih shakhmat ban pynpaw ka jingsngew diaw ba ki hap ban leit shaduh Nagaland, Jorhat, Mizoram bad wat shaduh Kolkata ban thoh ïa ka eksam CUET.
Kumta u Conrad u la ong ba kane ka la ktah bha ïa ki samla khamtam kito kibanwan na ki longïing ba duk ki bym kot bor. U ong ba kane kan pynbor ïa ki samla wat ban ieh noh syndon ïa ka jingpule jong ki.
Ha ka shithi sha u Myntri ka Sorkar Pdeng, u Conrad Sangma u la ong, “…Nga kyrpad jur ïa ka jingïarap jong phi ban bthah ïa ka NTA ban bishar bniah bad ai biang ïa ki jaka pule jong ki samla pule Meghalaya hapoh ka jylla. ka jingsngew kyrkieh lang hapdeng ki samla jong ngi, bad nga shaniah ba ka ophis jong phi kan ai ïa ka jingpyrkhat kaba khia kaba ka dei hok ban ïoh.”
“Kane ka jingkylla ka la buh ïa ka jingkit kaba khia kaba khraw halor kiba bun ki samla pule, khamtam kito kiba na ki longïing kiba duna ka ïoh ka kot, kiba mynta ki hap ban kit ïa ka jinglut kaba heh ha ka leit ka wan bad ka jaka sah. Ha kiba bun ki khep, kine ki jinglut ki long palat ïa ka bor jong ki,”bynrap biang u Myntri Rangbah.
Nangta u ong ruh ba kane ka jingeh kaba mih kam shym la pynthut tang ïa ka jingpynkhreh jong kine ki samla pule hynrei ka lah ban pynbor wat ban iehnoh shisyndon ïa ka eksamin.