Nongstoiñ, Risaw, 09: U bah Garod L.S.N Dykes IAS, District Election Officer bad Deputy Commissioner, West Khasi Hills District Nongstoiñ, u la pyntip ba katkum ka shithi na ka Election Commission of India kaba don No.64/MEGH-LA/2025/NES-II kaba la phah ha ka 26 tarik, Nailur 2025, la pynbna ïa ka jingpynbeit bad pynkylla thymmai (rationalization and reorganization) ïa ki Polling Station hapoh ki 3 tylli ki Assembly Constituency, kata ka 32-Nongstoiñ (ST), 33-Rambrai Jyrngam (ST), bad 34-Mawshynrut (ST), ban pynbiang shuh shuh ïa ka jingtrei election bad ban pynsuk ïa ki nongthep vote.
Ki jingkylla kiba la mynjur ki long Nongstoiñ (ST) Constituency, la pynkynriah noh ïa ka Polling Station No. 13 Umsaw na ka ‘UP School Building, Umsaw’ sha ka ‘United Christian UP School Building, Umsaw’. La thaw ka Polling Station kaba thymmai na ka daw ba ki nongthep vote ha PS No. 16 Mawlangkhar ki la palat 1200 ngut. Ka Polling Station kaba thymmai la ai kyrteng kum PS No.17 Tyllang.
La pynkynriah noh ïa ka PS No.17 Nongspung na ka skul kaba rim (Government L.P. School) sha ka skul kaba thymmai (New Government L.P. School building, Nongspung). La thaw ka section 4-Mawmlah kaba hap hapoh PS No. 54 Laitphlang. La thaw ka section ‘2-Pingbah’ kaba hap hapoh PS No. 64 Nonglwai.
Ha 33-Rambrai Jyrngam (ST) Constituency la pynbeit thymmai (reorganize) ïa ki Polling Station 14-Kyrshai Mihngi bad 15-Kyrshai Madan Shnong da kaba pynïasnohlang ïa ka bynta jong ki shynrang bad ki kynthei sha kawei ka Polling Station.
Ha ka 34-Mawshynrut (ST) Constituency, la thaw ka section kaba thymmai ‘7-Riangtem’ kaba hap hapoh PS No. 36 Nongriangkhaiñ. La thaw ka Polling Station kaba thymmai PS No. 51-Nongkaniang da kaba pynbeit noh ïa ka PS No. 50-Risiang.
Kine ki jingkylla ki dei shibynta jong ka jingpyrshang ban pynsuk bad pynbiang shuh shuh ïa ka jingthep vote jong ki paidbah bad ban pynlong ïa ka election kaba seisoh hapoh ka phang ‘Ka jingshimbynta bah ha ka Democracy kaba Khlaiñ’.
