Nongpoh, Risaw, 09: U Bah Kynsaihunlang Nengnong naka shnong Umroi Madan, u ba dei u General Sceretary ka RBYF Sengkmie hapdeng ka jingïakhun bad ka jingpang ba tang khyndiat sngi kaba la ban haka met jong u, u Blei u la ibit ban shim noh bad u la khlad noh na kane ka sla pyrthei hynnin ka miet haka por kumba 10 baje eiei ha Apollo Hospital Guwahati.
U Bah Kynsai Nengnong u la ud shitom dang ha kine ki khyndiat sngi bad leit phah sumar ha Dr H Gordon Roberts Hospital ha nongbah Shillong haka 30 tarik u bnai bala dep hynrei namar ka jingjur ka jingshitom, la pynkit noh ïa u sha Apollo Hospital Guwahati haka 3 tarik Risaw bad thiah hapoh ICU hapdeng ka jingbym tip briew, hynrei namar ka jingjur jong ka jingshitom ki doctor kim lah shuh ban sumar ïa u bad pynbna ba u la khlad noh haka por kumba 10 baje eiei hynnin ka miet jong ka 8 tarik Risaw.
Kum ban shu kdew hangne u Bah Kynsaihunlang Nengnong u dei ruh u briew u ba ju kit khia ïaki kam shnong kam thaw bad u bat ruh kum u General Secretary ka Umroi Dorbar Pyllun.
Ka jingkhlad noh u Bah Kynsai ka long ka jingdum tliw bad ka jingsngewsih kthangïaka iing ka sem hadien ba u la iehnoh shadien ïaka lok lem bad 3 ngut ki khun, ïaka seng RBYF baroh kawei, ïaka Umroi Dorbar Pyllun bad baroh kiba ieid ba thoiñ ïa u bad ka jinglehñiam ba khatduh ïa une u samla rangbah kan long haka 10 tarik Risaw ha iingsah jong u ha Umroi Madan.
Na ka liang ka seng RBYF lyngba u Bah Liander Nongshli Working President ka seng RBYF Sengkmie u la pynpaw ba kane ka jingkhlad noh jong u Bah Kynsai Nengnong ka long shisha ka jingduhnong kaba khraw ïaka seng RBYF baroh kawei, bad kum ka seng ka phah ka kyrwoh sngewlem ïaka iing ka sem naduh ka kurim bad ki khun ki kti ryngkat ki jingduwai ba u Blei nongbuh nongthaw un pyntngen bad ri sumar ïaka iing ka sem watla ki mad ïaka jingkthang ka mynsiem bad ka jingeh ha kum kane ka por.
