Nongstoiñ, Nailur 24: Ka Coordination Committee kiba kynthup ïa ki saw seng ka WKSU, WYF, MYF bad ka UHM, ka la dep ban dawa na u Deputy Commissioner West Khasi Hills District, ha kaba ïadei bad ka jingdonkam ban buh noh da ki khilon ha man la ki khappud jong ka West Khasi Hills, kum ka jingpdiang burom ïa ki nongwan jngoh kai kiba nabar ka jylla bad na bar District, kaba ruh kum ka jingpynithuh ïa ka jaka ba sdang bad kaba kut jong ka District.
Ki saw tylli ki seng ki la pynkynmaw ba ki la dep dawa halor kane ka bynta la katto katne bnai, ba dei ban buh ha baroh ki khappud kiba kynthup ïa ka border bad ka Eastern West Khasi Hills, South West Khasi Hills, East Garo Hills bad ruh ha ki khappud border bad ka Assam. Ha kitei ki khilon la ai jingmut ban buh ïa ki dur jong ki riew khraw, ki khla wait ka jaidbynriew Hynñiewtrep kum ka dak ka jingsah kynmaw ïa ki ha baroh kine ki khilon.
Halor ka jingïakynduh bad u Deputy Commissioner, u la kular ban shimkhia halor kane ka mat bad u la pdiang ruh ban shim ïa ki sien jam ban thoh sha ki tnad ba dei peit ban ïoh shwa ïa ka NOC na ka National Highway bad ruh ha kaba ïadei bad ka PWD office ban ïoh jingbit shwa na ki.
Na ka liang jong ki saw seng ki kyrmen ba kine ki jingdawa kin urlong khnang ba kan long kum shibynta ban pynskhem bad pynithuh ïa u pud u sam jong ka West Khasi Hills District. Na ka liang ki saw seng ki la pynkynmaw biang ruh ba u DC u dei ban shimkhia halor kane ka bynta bad ruh ban pynsted ïa ka kam, ha kaba ki saw seng ruh kin sa buddien halor kane.
