Pynkynmaw ki paid Khasi ba sah ha Langpih ïa ka Sorkar MDA halor ki kam pyntriem ka Assam naduh u snem 1979

Nongstoiñ, Nailar, 28: Ka jingpynkhreh jong ka sorkar Assam bad Meghalaya ban sdang ïa ka jingïapynbeit pud ha ka wat kaba ar ha kaba kynthup lang ruh ïa ka Langpih sector, ki riew rangbah katei ka thaiñ ba kynthup ïa u bah J.Wanñiang u nonghikai skul ba la shongthait, u bah J.Kharsyiemlieh sordar barim ka shnong Umtap bad kiwei kiwei ki riew rangbah haba pyntip ha u nongthoh khubor, ki la ong ba ki ai khublei bad sngewnguh ïa ka sorkar jylla ba ka la shim ïa kane ka sien jam kaba don kam tam kaba ki paitbah ki la khmih lynti da ki phew snem.
Kitei ki rangbah ki la ong ruh ba shuwa ba ka sorkar kan sdang ïa ka jingïapynbeit ïa u pud u sam ha ki jaka kiba hap ha ka Langpih sector, ki kwah ban pynkynmaw ïa ki katto katne ki jingjia kiba la pynjaw ummat bad pynpait dohnud ïa ki paitbah jong ka jylla lada ki dang kynmaw.
Kitei ki rangbah ki la ong ba ka jingjia kaba nyngkong eh ka dei ha u snem 1979, ha kaba ka la don ka jingklumar hadien ba ka sorkar Assam ka la wan buh ïa ka ktem pulit ha Langpih, ka la don ka jingïakajia hapdeng uwei u Nepali u ba ri khuti masi bad muid bad ki Khasi, namar ba u pyllait lan ïa kitei ki jingri bad ki pynjot lut ïa ki jingthung jingtep ha ki lyngkha jong ki Khasi.
Utei u Nepali u la leit ban ujor sha ki pulit Assam bad ki pulit Assam ki la kem ïa ki katto katne ngut ki rangbah Khasi, kumta ki paitbah na ki shnong katei ka thaiñ ba kynthup naduh Mawdiangsnam, Umpha, Langpih, Umyiap, Umtap, Mawlan, Umwahsiang, Umwali bad kiwei kiwei ki shnong ki la iehnoh ïa ki ïing ki sem, ki jingri jingdup, ki kper ki phrah bad ki la wan kiew sha Kyndongei kaba ïa jan bad ka shnong Mawkapiah, Nonglang bad kyrdum bad ki la shong shnong ha katei ka jaka bad don ruh kiba leit shong ha Nonglang, Nongstoiñ bad kiwei kiwei ki jaka.
Kiwei pat ki jingjia kiba kham hadien ïa kata ki long ka jingshah kem khah khah jong ki Khasi ha ki pulit Assam, ka jingshah tied shah bom jong ki Khasi namar ka jingïakajia bad ki Nepali, ka jingshah pynpra jong ka Raidmynsaw M.E skul. Ka jingjia kaba la pynpait dohnud bad pynjaw ummat ïa ki paitbah ka thaiñ, ka dei ka jingshah siat ïap jong ki saw ngut ki rangbah Khasi ha ki pulit Assam kaba la jia ha ka 14 tarik Jymmang 2010, kaba ym pat ju don kaba kum katei ka jingjia ha kiwei pat ki jaka ia kajia pud hapoh ka jylla la ka long ha ne ha kiwei kiwei ki bynta jong ka jylla.
Nalor kata ka jingknieh jubor jong ka Assam ïa ka ïing ba la thied da u (L) bah Hopingstone Lyngdoh bad phah shong ia ki nongtrei jong ka Forest Department haduh mynta. Nalorkata, ki don sa kiwei pat ki jingjia kaba kham hadien ba ki pulit Assam ki la pyndik bad pynibor ïa ki Khasi kiba dei ki trai shnong kum ka jingpynsangeh jubor ban pynpoi bording sha Mawdiangsnam bad Umyiap, ka jingthmu ban wan shna ïa kawei pat ka ktem pulit ha kper jong ka kong Kwistilda Lyngdoh Marshilong bad ka kong Sngewbhalin Paliar ha Umwali.
Dang ha ka 31 tarik jong u bnai ba la dep uwei u Kontraktor na Assam ryngkat uwei u heh sorkar, ki la wan thew jaka ha ka kper jong u Bines Nongbah, kaba don ha Umsynrih hajan ka Kamakhya Mandir, kaba jngai tang kumba shiteng kilomitar na ka ktem pulit jong ka Assam kaba don ha Langpih, khlem da pyntip ïa u trai.
Kitei ki rangbah ki la ong ruh ba ka jingpynkynmaw jong ki ïa ka sorkar halor kitei ki jingjia, ka long ba shuwa ban pynbeit ïa u pud u sam ha ki jaka kiba hap ha ka Langpih sector, ka dei ban da pyrkhat bha bad bishar bniah bin pa bin, namar ki paitbah katei ka thaiñ ki ïeng skhem ban dawa katkum ki nongrim kiba skhem bad ki kwah ba ïa baroh ki shnong kiba u (L) bah Hopingstone Lyngdoh u la pynrung hapoh u pud u sam jong ka map United Khasi & Jaiñtia Hills, ki la ïoh ban thep vote ha ki MDC Election, naduh ka por ba ym pat ïoh ïa ka jylla ba pura ki dei ban hap hapoh ka Meghalya kata ha West Khasi Hills District. Namar lada bakla na kata kan wanrah ïa ka jingïakhih kaba kham shyrkhei ban ïa ki por ba la dep. Ki paitbah katei ka thaiñ khlem artatien kin kylla phetwir biang sa shisien, kumta kim kwah satia ba ki paitbah Khasi kin kylla phetwir ha la ka jong ka ri.