Nongstoiñ, Naitung 10: Ka tnad Fisheries jong ka sorkar jylla Meghalaya lyngba ka Office jong u Superintendent of Fisheries West Khasi Hills District Nongstoiñ, mynta ka sngi ka la rakhe ïa ka National Fish Farmers Day kaba 26 halor ka phang, ‘Empowering Fish Farmers for a Sustainable & Prosperous Future’.
Ha kane ka sngi ka Hema Nayak IAS Deputy Commissioner ka West Khasi Hills District, ka la long kum ka kongsan bad la ïasynranlang ruh u Bah P. Lamin Superintendent of Fisheries West Khasi Hills, bah T.Syiemlieh Fishery Supervisor bad kiwei kiwei ki ophisar sorkar.
Ïa katei ka jingïalang la pynïaid da u Bah Govinsen Ïawphniaw ha Training Hall Porsohsat Fish Farm Nongstoiñ bad kum ka dak jong ka jingrakhe ïa kane ka sngi kyrpang, la sam ruh ïa ki symbai dohkha sha kumba 50 ngut eiei ki nongri dohkha jong ka thaiñ, ryngkat ka jingthmu ban pynkiew ïa ka jingpynmih dohkha.
Ki phra ngut ki nongri dohkha kiba la kiew shaphrang na ki phra tylli ki Block kynthup ïa u bah Arwin Mawsor na Umdang, bah Forlandson Langrin na Mawthylliang, Bah Thwostar Syiemlieh na Nonglang, Bah Ades Lyngdoh na Mawkaton bad bah Blikstarwell Mawlieh Nongsiej na Rambrai, ki la ïoh ïa ki syrnod ne ka ‘Certificate of Recognition’ na ka bynta ki jingnoh synñiang ba radbah jong ki ha ka kam ri dohkha, kaba la long ruh ka jingjop jong ki ka ban ai mynsiem ïa kiwei pat ki nongrep, ban shim ïa ki rukom ri dohkha kiba stad kiba lah ban pynneh pynsah na ka bynta ka lawei.
Ka kongsan haba ai jingkren ka la ban jur halor ka jingdonkam jong ka kam ri dohkha kum ban pynkhlaiñ ïa ka jingim ki nongkyndong, kaba dei ruh ka jingbam ba tei met naduh kiba dang rit haduh kiba la heh la san.
Ka kongsan ka la ban jur ruh ha kaba ïa dei ban thaw ïa ki lad ïoh kam ïoh jam ha kum kane ka por jong ka kyrduh kam kyrduh jam, ka por jong ka hiran ha ka ïoh ka kot bad ha baroh ki liang. Ka la ong ba ka lah dei ka por ban pynkylla noh ïa ka jingïakop khwai dohkha sha ka jingpynmih dohkha, namar kan myntoi ïa baroh lang khamtam na ka bynta ka lawei bad pateng ban wan.
