Mawkyrwat, Ïaïong 23 : Ka Jakrem Presbyterian Higher Secondary School kawei na ki 18 tylli ki skul ba rah ïa ka nam jop ha ka lympung jong ka 2nd Inter-School Sport Meet 2023 ba la pynïaid da ka Seng Samla Shnong Jakrem (SSSJ) ha kaba u bah Renikton Lyngdoh Tongkhar, u nongmihkhmat jong ka Mawkyrwat Constituency u la long u kongsan ha kane ka lympung ba la pynlong ha shnong Jakrem, South west Khasi Hills District.
Lah ban kdew ba ha kane ka 2nd Inter-School Sport Meet 2023 ki skul kiba la wan ïashimbynta ki don baroh haduh 18 bad kiba don nappoh ka shnong Jakrem bad ïa kane ka lympung jingïalehkai la ïoh ban sdang naduh ka 20 tarik bad pynkut pat ha ka 21 tarik u Ïaiong, 2023.
Ha kane Inter-School Sports Meet 2023 na ka liang ka Seng Samla Shnong Jakrem ka la ïoh ban pynïalehkai ïa shibun ki jait jingïalehkai ha ki bynta bapher bapher kata na ka bynta ki khynnah skul shynrang bad kynthei bad kiba la long da shisha kiba jingïalehkai kiba i shongkun lyngba da ka jingwan ïa shimbynta ryntieh jong ki khynnah skul.
Ym tang ka jingpynïalehkai, hynrei na ka liang ka Seng Samla Shnong Jakrem ka la ïoh ruh ban ai sngewbha da ki khusnam ïa baroh ki nongjop kiba la wan ba nyngkong, ba ar bad ba lai.
Haba kren ha ka jingïalang ba lyngkot, u bah Enbor Syiemiong, President jong ka Seng Samla Shnong Jakrem u la ong ba ka jingpynlong kum ïa kane ka Inter-School Sports Meet ka long kum shibynta ban lum lang ïa ki skul kiba don hapoh jong ka shnong ba kin don ïa ka mynsiem jong ka jingsngewieit sngewjan bad ruh ban kyntiew ïa ki khynnah ha ki bynta ïadei bad ki kam ïalehkai namar lah ban ong ba ka shnong Jakrem ka dei kawei ka shnong kaba ju sei ïa ki ‘rang bad ki ‘thei samla kiba la paw bha bad kiba la ïoh ruh ban mihkhmat ïa ka distrik bad ruh ïa ka jylla ha ki jait jingïalehkai bapher bapher.
Ha ka jingkren jong u bah Renikton Lyngdoh Tongkhar kum u kongsan u la pynpaw ka jingïaroh ïa ka Seng Samla Shnong bad ïa ka shnong hi baroh kawei namar lyngba ka jingpynlong ïa kane ka lympung jingïalehkai ka la long ka nuksa kaba bhatam. Ha kajuh ka por u la kyntu ruh ïa ki khynnah skul ba kin shim ka nuksa ba ki dei ban buh ïa ka thong ba hakhmat eh kumba ki nongmareh thong mynta ki don hi la ki jong ki jong ki jingthmu. U la ai mynsiem ruh ïa ki khynnah skul ba ki long ki khynnah skul kiba trei shitom bad kiba don ka thong ban jop la ha kino kino ki jait jingïalehkai.
Ha kane ka sngi nalor u kongsan, la ïa donlang ruh ki nongkitkam jong ka Seng Samla Shnong Jakrem, na ka Jakrem Sport Club, u Myntri Shnong, ki ‘riew rangbah, ki nonghikai bad ki paidbah kiba la wan pynshit pynshngaiñ lem ïa ki khynnah skul.
