Pynkut ka HC ïa ka mukotduma shah jied MLA u Myntri ka tnad PHE

Shillong, Nailar 22: Ka ïingbishar High Court of Meghalaya, ka la pynkut noh ïa ka mukotduma jong u Tennydard R. Marak halor ka jingshah jied MLA jong u Marcuis R. Marak, MLA jong ka Williamnagar uba long u Myntri ka tnad PHE jong ka sorkar jylla.
Ka ïingbishar nalor ba la pynkut noh ïa kane ka mukotduma, ka la daiñ kuna ruh 15 hajar tyngka ïa kaba u Tennydard u hap siew sha ka Meghalaya State Legal Services Authority.
Shisngi hadien ba la kut ki kam elekshon, kata ha ka 4 tarik u Lber 2023, u Tenny u la ujor da ka ehajar sha ki Pulit halor ki jingkynnoh ba u Marquis uba long u kyrtong ka Seng NPP ha kane ka elekshon, u la pynkheiñ ïa ki kyndon jong ka election commission ka ri India lyngba ki jingpynbna paidbah jong u.
Hadien kane u la ujor sa da ka writ petition sha ka High Court of Meghalaya halor kane kajuh ka phang. Ka ïingbishar ka la shim bishar ïa kane ka ka kam bad ha ka hukum kaba la pynmih mynta ka sngi da kaba pynkut noh artad ïa ka jingtian bishar.
Haba sot katto katne ki mat na kane ka hukum, ka ïingbishar ka la ong ba ka mukotduma ka long ban pynduh ne ban knieh noh ïa ka jinglong MLA jong u Marcuis Marak bad ka ïingbishar ka la ong ba ka dei ka kam jong ka Election Commission jong ka ri India. Hynrei u nongujor u la ai da ka writ petition ha ka jaka ba un ai da ka election petition. Ka ïingbishar ka la ong ba lada pynduh noh ïa ka jingshah jied MLA u nongshah ujor ka long pyrshah ïa ki kyndon jong ka Peoples Representation Act jong u snem 1951.
Kumta halor kane ka nongrim, ka ïingbishar ka la pynkut noh ïa ka jingshim bishar bad kheiñ ruh ba ka dei ka jingujor kaba bakla. Kumta ka la daiñ kuna 15 hajar tyngka ïa u Tennydart bad phah thep ïa kane ka pisa na ka bynta ka Meghalaya State Legal Services Authority.