Nongpoh, Jymmang, 27: Ka College of Post-Graduate Studies in Agricultural Sciences (CPGSAS), Umïam, Meghalaya ha ka sngi Saitjaiñ ka la pynkut noh ïa ka ‘12th National Seminar’ kaba ki la ai kyrteng halor ka phang “Futuristic Agriculture: Technology, Sustainability and Beyond” kaba dei ka prokram kyrpang ba ki riew shempheng bad ki riew proh jabieng ha ka rep ka riang ki la ïa thir sani ha kaba kyntiew ïa ki kam rep ki kam riang kiba kyntiew ïa ka ioh ka kot ki nongrep.
Haba pynlong ïa kane ka Seminar la ïa trei ryngkat ruh bad ka Society for Community Mobilization for Sustainable Development (MOBILIZATION), New Delhi; National Horticulture Board (NHB), kas sorkar India; ICAR Research Complex for NEH Region, Umïam; bad ka ICAR-ATARI, Guwahati (Zones VI & VII).
U Dr. Anupam Mishra, uba dei u Vice Chancellor, CAU (Imphal) kum u kongsan jong kane ka jingpynkut noh ïa ka Seminar, u la kham ban khia halor ka jingpyndonkam ïa ki jingstad lyngba ki artificial intelligence ban pun jingkieng ha ka rukom treikam ban pynkhlaiñ ban pynmih ïa ki mar rep kiba lah ban ai jingmyntoi ïa ki nongrep. Ha kane ka sngi, u la ioh pdiang ruh ïa ka khusnam ba ba la tip kum ka life time achievement award da ka Society, kiba dei halor ka jingdon bynta bad ki synñiang kiba u la synñiang ban kyntiew ïa ka jingim bad ka ioh ka kot ki nongrep.
U Prof. D. Thakuria, Dean ka CPGSAS, bad uba dei ruh u chairman ka overall co-ordination of local sub-committees, u la ai jingtip halor ka kaiphod kiba la lym jingtip kyrpang ïa ki jingtreikam kiba lah ban dang kyntiew ïa ka jingim bad ka ioh ka kot ki nongrep lyngba ki kam rep ba pyndonkam lyngba ki juk stad jong ka pyrthei.
La sakhi lang ruh ha kane ka sngi da ka jingdon lang kiwei kiwei ki riew proh jabieng ha ka rep ka riang kiba bet shibun ki symboh pyrkhat ban dang pynjanai ïa ka kam rep ka kam riang bad la pynkut ruh ïa kane ka Seminar da kaba sam ïa ki khusnam sha kito kiba la don ka bynta kaba khraw ha kaba saiñdur bad kyntiew ïa ki kam rep ki kam riang.
