Mawkyrwat, ‘Nailar 30: Kum ka dak jong ka jingaimynsiem halor ki kam noh synïang jong uwei u samla rangbah ha ki kam ïalehkai, na ka liang ka Sports Committee jong ka Khasi Students Union (KSU) South West Khasi Hills District Unit ka la ïoh ban pynkup burom ïa u bah Kisstarlin Wanniang uba dei uwei na ki Nongpynïaid ïalehkai Football bad Futsal (Football Referee & Futsal Referee) napoh South West Khasi Hills District.
Lah ban kdew bah Kisstarlin Wanniang u la leit ban ïashimbynta kum u Nongpynïaid ïa ki jingïalehkai Futsal bad Beach Soccer ha ka National Level. Shuh shuh ha u snem 2022, u la shah jied ban pynïaid ïa ka All India Futsal Clubs Championship 2022 ha New Delhi. Ym tang kata, ha u snem 2023 , u la shah jied ban pynïaid ïa ka Hero National Beach Soccer Championship 2023 ha Surat ( Dumas Beach) , Gujarat bad ha u snem 2024, u la shah jied biang ban leit pynïaid ha ka All India Futsal Clubs Championship 2024 kaba la long ha Vadodara, Gujarat.
Nangta, u la dei uwei na ki samla rangbah ba la ju leit ïashimbynta ha ki jingpynïaid kum u Referee ha ki jingïalehkai Futsal bad Football ha kiba bun ki lympung kiba heh shabar jylla.
Namarkata, ka KSU ka ai ka jingkitbok kitrwiang ïa u bah Kisstarlin Wanniang ba un nang ïai trei shitom bad nang ïai kiew ha ka sap ba u u don khnang ba kan long ka jingsarong ïa ka dong ka thaiñ bad ka Jaitbynriew hi baroh kawei.
