Pynkup burom u MLA ïa 4 ngut ki samla ba wanrah nam kyrpang ïa ka jylla bad constituency
Shillong, Naitung 06: U MLA ka 17th North Shillong Constituency u Bah Adelbert Nongrum u la pynkup burom ïa ki sawngut kiba la wanrah ïa ki nam jop ïa ka jylla, nangta ïa ka constituency na ki jingïakhun bad jingïakob bapher bapher, kiba kynthup ïa u samla Hebron C. Nongrum National Institute of Design (NID) Exam All India Rank 1st (ST) da ka cheque T. 50 hajar, nangta ïa u Naason R Lyngkhot Class XII HSSLC Examination 2025 Rank 8th Position in Commerce uba la ïoh da ka khusnam Tablet na u MLA, nangta u Graham Kharnarbi 4th National Arms Wrestling and Para Arm Wrestling Gold Medel Left, Silver Medal Right Hand uba ïoh T. 45 hajar bad ka Miss Universe Meghalaya ka ban mihkhmat sha ka Miss Universe India ka ban sa long, ka samla Sanwaka Surong da ka cheque T. 40 hajar,
Haba kren ha ka prokram u MLA u la pynpaw ka jingsngew sarong ban ïohi ïa ki khun samla kiba la trei shitom ban kynjoh sha ka thong bad kyntu ruh ba kim dei ban pyrkhat than tang ha ka jingpawnam hynrei ban long kiba ngeit skhem haba ki ïaid shakhmat ha ki jingim.
U la pynpaw ka jingai khublei ia ki bahaiing hasem bad ki kmie ki kpa kiba la long ka jingai mynsiem. “Kine kiba wanrah ia ka nam jop kin dei ban long ka jingai mynsiem ia kiwei pat da kaba ong ba balei kiwei ki lah bad nga ngam lah,” ong u Bah Nongrum.
“Ka long ka jingsarong shisha ia nga kum u MLA ban don ha kane ka constituency bad kumjuh ruh nga la don ka thong bad la pynbna ruh ha ki dorbar shnong bapher bapher ban ai ki khusnam ba kyrpang naduh ki tymmen ki kro, ki samla pass bha, kiba don jingiapher ha ki dkhotmet, kiba ialehkai, bad kiwei na ka bynta u snem 2023-2025 ban pynsahnam ban pynsah ka burom na ka bynta jong ki. Kadei ka kamram, ka jingkitkhlieh jong nga kum u MLA ban leh eiei na ka bynta ki khun samla kiba la wanrah ka nam ka burom naba ki la trei shitom, ki la minot, ka jinglen lade ba kin poi sha ka thong ban kiew kham shajrong shuh shuh naba ki long shisha kiba la jied napdeng kiwei,” ong u MLA.
Ïa ka jingïalang la sdang da ka jingduwai na u Rev Pastor Marshal War, nangta bud ki jingpynkup burom bad ki jingkren na ki samla kiba ïoh khusnam bad kumjuh ruh na kiwei kiwei. Ïa kane ka prokram la pynlong ha ïingsah u MLA ha Jaïaw Lumsyntiew.