Jowai, Risaw 05: Ka Women’s Welfare Organisation, Seiñraij (WWOS) Jowai mynta ka sngi 5 tarik kala pynlong ïa ka jingpynkup burom ba kyrpang ïa ki khun samla ka ñiamtrai, ha ka jingïalang ba la long ha Dorbar Hall jong ka Loompyrdi Iongpiah, Jowai ha kaba u ma Wailadmiki Shylla uba dei u MLA 2-Jowai Constituency ula long kum u kongsan.
Ha kane ka sngi la ïadonlang u ma A. Andrew Shullai, MDC-Jowai Central kum u symbud kongsan ha ryngkat u Dolloi ka Elaka Jowai Wh. Puramon Kynjin, ki riew rangbah jong ka Seiñ Raij Jowai nalor kiwei de kiba la shah khot sngewbha.
Ïa ka jingïalang la pynïaid da ka kong da ka kong Hima Lakiang, Chairperson WWO, Seiñraij la ïoh ka jingainguh da ka Rilistina Pyrbot, Member WWO-SRJ, katba u ma Arwotki Sumer, General Secretary, Seiñraij Jowai ula ai ïa ka sneng ka khraw sha ki samla pule kiba la shah pynkum burom ha kane ka sngi, katba ka Hunbaitki Dkhar, Secretary WWO-SRJ haba kut jong ka jingïalang kala ai ki kyntien sniawnguh.
Na ka liang u kongsan ma Wailadmiki Shylla haba ai jingkren ula ai ka jingïaroh ïa ki dkhot ka Women’s Welfare Organisation, Seiñraij kiba la trei shitom met bad mynsiem ban wanrah ïa ka bha ka miat hapoh ka imlang ka sahlang, watla ki don hapdeng kiba bun ki jingeh ha ka jingïaid lynti kum ka seng treimon sngewbha.
Ula ai mynsien kumjuh ïa ki khun samla jong ka ñiamtrai kiba la shah pynkup burom mynta ka sngi ba kin pynleit jingmut ha ka jingpule kot bad ban don ka thong ban ïoh khambun ki Percentage ha ki exam bapher bapher, da kaba u kyntu ba kim dei ban klet pat ïa la ka tynrai jong ka jingmut jingpyrkhat.
Kum ka dak ban ai jingkyrshan ïa ka Women Welfare Organisation, Seiñraij ha ka jingïaid lynti ba kham shakhmat, na ka liang u MLA ula ai jingïarap ïa kane ka seng da ka pisa kaba shilak tyngka.
Katba u ma A. Andrew Shullai ula ai mynsiem ïa kitei ki khun samla baroh da kaba ong kum ha kane ka juk stad ba mynta ki khun samla kim dei ban shañiah tang ha ka kam sorkar, nalor ba ki khun samla kila long kiba stad kaba donkam ruh shuh shuh ïa ki ban long kiba janai ha ka sap ka phong bad kiba lah ban pynïadei ïa ki kam ba bha jong ki bad kiwei de ha ka jingim ba manla ka sngi.
La ïathuh ba kane ka jingpunkup burom ka Womens Welfare Organisation-Seinraij ka long kyrpang ïa ki khun samla kiba la ïoh 80% shaneng ha ka HSSLC bad ka SSLC, katba 70% shaneng ïa kito kiba la pyndep ïa ka Degree Course ha ki laiñ pule bapher bapher.
Ki lai ngut ki samla pule ka ñiamtrai kiba la ïoh ïa ka Topper ha uni u snem ki kynthup ïa ka Hakacheini Passah na Loomiongkjam kaba pass ïa ka HSSLC Examination 2021 da kaba ïoh 88.8% ryngkat ka Distinction ha ka Khasi, Chemistry, Biology, Maths bad ka Physic, U Roderick Passah na Dulong ha ka SSLC Examination 2022 uba la ïoh 90.50% deilang ka Distinction ha ka English, Additional English, Science & Technology, Social Science, Mathemmatics bad ka Physical & Health Education, kumjuh ïa ka Arwaka Lamurong na Dulong ha ka SSLC Examination 2021 kaba la ïoh 87.83% ryngkat ka Distinction ha ka English, Mathematics, Scince & Technology, Social Scince, Health Education bad ka Khasi.
