Nongstoiñ, Risaw, 31: Kum ka dak jong ka jingsngewnguh bad ka jingburom ïa kawei ka longkmie kaba la tip kyrteng kum ka kong Dwistina Lyngdoh Marshillong, lem bad ki katto katne ngut ki riew rangbah ka thaiñ kiba la noh synñiang ïa ki paitbah ha kiba bun ki liang, ka Synjuk Nonhsynshar Shnong Mawkhiat Sepngi Area, ha kane ka lah sngi u Blei ka 27 tarik Risaw ka la pynlong ïa ka jingïalang ha phyllaw jong ka ïingdorbar jong katei ka shnong ban pynkup burom kyrpang na ka bynta ka jinglen lade jong ki ha ka imlang sahlang.
Ka jingpynkup burom jong ka Synjuk lem bad ki nongïalam ka FKJGP Rambrai circle ïa ka kong Dwistina Lyngdoh Marshilong, ka dei namar ka jingnoh synñiang jong ka ha ka ban pynkha khun ïa ki longkmie ym tang ha ki ïing ki sem hynrei kaba leit ban synran haduh ki jaka sumar ban pynkha ïa ki.
Kaba kham sngew tynnad ka long ba katei ka longkmie ka la ju pynkha khun ruh wat ha shiteng lynti, ha ka por ba ki kali kiba leit buh ïa ki longkmie kiba armet sha ki jaka sumar ki sahkut ha shiteng lynti, namar ka jingbym don ïa ki surok ba biang bad ki hap ban ïaid na ki surok ba ïaid ki trok kit dieng na khlaw.
Ha kajuh ka por la pynkup burom lang ruh ïa ki trai jong ki kali Mahindra pickup bad jeep four wheels, kiba la noh synñiang ban kit ïa ki longkmie kiba armet ban leit kha khunlung sha ki hospital man la ka por, khlem kheiñ ïa ka miet ka ïong bad kumjuh ruh ïa kiba pang ba shitom kiba don kam ban pynpoi sha ki jaka sumar.
Ha kaba ïadei bad ki jingeh ba ki paitbah katei ka thaiñ ki ïakynduh ka long kaba ym lah satia ban mutdur, nalor ba ka surok ka dei tang ka surok ba ki trok kit dieng ki ïaid, nalor kata ka jaka ka dap tang da ki khlaw ki btap kaba la buh ïa ki nongshong shnong ha ka jingeh kaba khraw.
Haba phai ha ki lynti synkien ka dang don tang ka surok PMGSY na Rambrai sha duh Mawrok, hynrei ban leit sha ki thaiñ Mawkhiat pat hap ban rung lyngba ka surok khlaw kaba ïaid na ka shnong Mawdet sha Mawshad haduh Mawkhiat, Rynñiaw, Umshem, Mainop bad bun kiwei kiwei ki shnong ha katei ka thaiñ ki bym pat don surok satia.
Nalor kata ki khynnah kiba leit skul ha Mawdet Upper Primary skul naduh Mawkhiat ki hap ban ïaid da ka kjat kumba ar kynta tam man la ka sngi lyngba ki khlaw ki btap ki khohruh khoh ram.
