Shillong, Naiwieng, 06 : Ïa ka jingpynkup burom ïa ka batch kaba 102 jong ki shah hikai Computer bad ka batch kaba 41 jong ki shah hikai Language la pynlong ha ka 4 tarik u Naiwieng 2023 ha auditorium jong ka Ramakrishna Mission Vivekananda Cultural Centre. Ha kane ka sngi la wan ïashim bynta lang da u BDR Tiwari, Commissioner & Secretary sha u Lat ka Jylla bad Chief Electoral Officer jong ka Sorkar Meghalaya, kum u Kongsan.
Ha kane ka prokram, la pynbna ïa ki nongjop ha ki jingshahhikai ha ki thup bapher bapher ha kaba ki la don ki khusnam kum ki Session Topper, ki Best Project, ki Best Personality, bad ka jingai sngewbha ïa ka kor Computer. U Banjop Kupar Warjri u la ïoh ïa kane ka jingai sngewbha da ka kor computer namar ka jingpyndep hynriew tylli ki jingai jinghikai ha kane ka jaka ai jinghikai.
Ha ka jingai jingkren jong u, u Dr.Tiwari u la ban jur halor ka jingnoh synniang jong ka Ramakrishna Mission sha ka imlang sahlang, ka nongbah bad ka jylla.
U Br Vairagyachaitanya Maharaj, Director-Academics ha ka Ramakrishna Mission Vivekananda Cultural Centre, u la ai jingtip shaphang ki resol jong kane ka samoi. Kumba 1170 ngut ki shahhikai ki la pynrung kyrteng bad 860 ngut ki la ïoh ïa ki certificate. U la pdiang burom ïa baroh kiba wan ïashim bynta ha kane ka sngi bad u la kitbok kitrwiang ïa ki ha ki kam ba kin trei. U la pynshlur ïa ki shah hikai ba kin pyndonkam ïa ki jingai jingshakri jong kane ka kynhun khamtam ha kaba ïadei bad ka jingai jinghikai computer ba kham halor.
Na ka liang ki nonghikai, u Robertson Thangkhiew bad ka Sophia Katrai, ki la kitbok kitrwiang ïa ki khynnah pule bad ki la kyntu ïa ki ba kin bteng ïa ka jingwad ïa ka jingnang jingstad da kaba kdew sha ki kam digital ba ïar kiba don.
U Swami Divyaswarupananda Maharaj, Centre-In-Charge, u la ai jingsngewnguh bad u la ïaroh ia ka jingtrei shitom jong ki nonghikai kaba la pynlong ruh ba kane ka prokram mynta ka sngi ka long kaba iaid beit iaidryntih.
U la kren ruh shaphang ki kam u Swami Vivekanandana ka bynta ka imlang sahlang bad u la kyntu ïa ki shah hikai ba kin pynsaphriang ïa ka nam jong u bad ki jinghikai jong u. Ha kane ka prokram, la don ruh ka jingbatai shaphang kane ka samoi ai jinghikai.
