Pynkup burom ka RCDC ïa ki 182 ngut ki samla pule kiba la leh bha ha ki eksam

Mawkyrwat, ‘Naiwieng 3 : Ka Ranikor Constituency Development Committee (RCDC) lyngba ka Education Cell kum ka dak jong ka jingaimynsiem na ka bynta ki samla pule jong ka dong ka thaiñ ka la ïoh ban pynkupburom ïa ki samla kiba pass ha ka SSLC/HSLC/HSSLC/Diploma Course, Bachelor Degree, Master Degree, Doctors bad kiwei de ki kyrdan pule kiba dei jong u snem 2020 – 2022 da ka khusnam “Sha ka Thong Excellence Award 2022” (STEA) ha kaba ki 182 ngut ki samla ki la ïoh pdiang ïa ka khusnam.
Ha kane ka sngi, nalor ki samla pule, ki don ruh ki jingaisngewbha na ka bynta ki samla kiba don ka sap ba kyrpang kiba la ju mih khmat ïa ka distrik sha ka State bad National Level kum ha ka Swimming, Super Star jong ka Dancing ne Singing Competition kham kyrpang eh ka la pynkup burom ruh ïa ki saw ngut kiba la pass ïa ka kyrdan Doktor kata ïa ka Dr. Balapynhunshisha Syiemlieh, u Dr. Khrawkupar Kharryja, u Dr. Kitdor Diengngan, bad u Dr. Gliff Richard Nongsiej bad kumjuh ruh kiba la noh synñiang ha ka imlang ka sahlang u Lamkupar Snaitang, u ba la ïarap ban sei ïa ka met jong u briew uba la ngam jyllop ha ka 15 tarik u ‘Nailar, 2022 ha Wah Umngi.
U Ma Lehkmen Rymbui, Myntri ka tnad pule puthi ka jylla Meghalaya haba kren kum u kongsan u la pynpaw nyngkong ka jingaikhublei na ka bynta ka Ranikor Constituency Development Committee (RCDC) kaba la leh ïa kane ka kam kaba bha tam ban kynmaw burom na ka bynta ki samla pule kiba la wan shakhmat ha ki jingïaleh eksam bapher bapher kyrpang ruh na ka bynta ki saw ngut ki doktor kiba la long ka jingkyrkhu ïa ka imlang ka sahlang lyngba ka jingshakri jong ki bad lyngba kane ka prokram kan long ka jingaimynsiem na ka bynta jong ki ba kin nang ïai trei shitom shuh shuh ym tang ban pdiang ïa kane ka khusnam mynta ka sngi hynrei ba kin ïoh pdiang ïa kiwei de ki khusnam.
Ha kajuh ka por u la ai mynsiem ba ka jingpule ha kine ki sngi ka long kawei na ki bynta ba kongsan tam namar ym tang ba ki pynleit ïa ki jingmut jingpyrkhat ha ki jingpule tang ban ïoh ïa kata ka kam sorkar hynrei ba ki dei ruh ban long kiba nang kiba stad ban trei de ïa ki kam la jong, namar ban pyrkhat eh tang ka kam sorkar ka long kaba bakla hynrei ki dei ruh ban peit da kaba kin long ki samla kiba lah ban ïeng ha la ki jong ki kjat ne ban seng ki kam ki jam la jong. “Ka jingnang jingstad ka long kaba donkam namar ka plie ïa ka lad ka lynti lyngba ki jingmut jingpyrkhat kiba ïar ba kin lah ban pyrkhat kaei kaba kin leh nangne shakhmat”, ong u bah Rymbui.
Ha ka jingkren jong u, u la buh ruh ka jingkyntu na ka bynta ki 182 ngut ki samla kiba la ïoh ïa ka khusnam mynta ka sngi ba ki dei ban peit nuksa ryngkat ka jingkylli ha lade ba lada ki ‘riew rangbah kiba la leit ha shwa jong ki, kiba la pyni ha ki ïa ka jinglah jong ki ban poi sha ka thong jong ka jingjop ha kiba bun ki bynta ne ki poi sha kliar jong u lum jong ka jingphyrnai, balei ma ki kim lah ban leh ïa kata. Namarkata, u la ai mynsiem ba wat long ki samla pule kiba duh jingkyrmen hynrei ki dei ban long borabor ki samla pule kiba trei shitom bad long ïaishah ha kiei kiei baroh.
Haba kren ha kaba ïa dei bad ka wad kam wad jam, u Ma Lehkmen Rymbui u la ong ba ha kane ka juk ba mynta ym donkam shuh ka por ban buh ïa kita ki ‘Shopping Mall’ kiba heh, hynrei ki la don ha ki kti jong ngi. Kumta u la kyntu ba kum ki samla synrang bad kynthei ba ki dei ban pyndonkam hok ïa ka ‘mobile phone’ ba ki don ha ki lhoh kti jong ngi namar lada ki pyndonkam hok ïa ka kin lah ban kamai kumba long ha ka por ba don ka khlam Corona Virus.
Ula kren ruh halor ka jingdon jong ki lynti ki synkien, namar da ka jong ki surok kiba bha ba pynïasnoh na kawei ka shnong sha kawei pat bad na kawei ka distrik sha kawei pat kan long ka jingkyrkhu ïa ka dong ka thaiñ lyngba ki lad jngohkai pyrthei ha kaba kine ki jaka jong ngi ki don shibun bah ki jaka shongkai pyngngad kiba itynnad ha kaba ki briew kiba nabar kin ïoh ban wan kai pyngngad bad kan sa long ruh ka jingaikam bad pynïoh kam ïa kiba bun ki khunsamla. Kumta ban kyntiew ïa kata ka bynta ka donkam ruh ka jingïatreilang bad jingïasnohkti lang jong baroh ki paidbah nongshong shnong.
Kiwei pat ki nongkren ki long ka kong C. Kharkongngor, IAS, Deputy Commissioner kum ka symbud kongsan, u bah Pius Marweiñ, MLA/MDC jong ka Ranikor Constituency bad kum u Chairman jong ka Ranikor Constituency Development Committee (RCDC), u bah G.G. Bung Snaitang, President ka UDP Ranikor Circle.
La pynshit pynshngaiñ ïa kane ka sngi da ka jingrwai na ka samla Memmillin Snaitang, ka jingshad tynrai na ka Hajong Dance, Lyngngam Dance, Bengali Dance, Garo Dance, Khasi Dance bad ka jingrwai na u Greatman Wanniang.
Kiwei pat kiba ïadonlang ki long u bah B.J. Laloo, MPS, Superintendent jong ki Pulit, South West Khasi Hills District, u bah K.C. Nongrum, Executive Engineer ka PWD (Road), Ranikor Division lem bad kiwei de ki ophisar Sorkar. Ïa ka jingïalang ha kane ka sngi la pynïaid da u bah M.N. Thongni, ka jingkren pdiang sngewbha na u bah C. Nongbri, Working President ka UDP Ranikor Circle, bad ka jingkren khublei na u bah Vianey Sangma.