Pynkup burom ka RBDSA ïa ki rang bad thei ïalehkai Meghalaya Games bad Khelo India Youth Games

Nongpoh, Rymphang 13: Ka Ri-Bhoi District Sports Association (RBDSA) mynta ka sngi ka la ïoh ban pyndon burom ïaki 108 ngut ki samla kynthei bad shynrang kiba la wanrah nam bad burom ïaka district naka lympung 5th Meghalaya Games 2024 kaba dang shu long shen ha Tura, bad kumjuh ruh ïa 4 ngut ki rangïalehkai phutbol ka Ri-Bhoi kiba la leit mihkhmat ïaka jylla sha ka lympung 6th Khelo India Youth Game kaba dang shu dep shen ha Tamil Nadu ba ka kynhun ïalehkai phutbol ka jylla kala ioh ruh ban khur ïaka nam lahduh na katei ka lympung.
Na ka liang ki nongïalam ka RBDSA ki la pynpaw ïa ka jing sngew nguh eh ïa baroh ki rang bad ki thei ïalehkai kiba la lah ban kyntiew ïaka nam bad ka burom jong ka District lyngba ka jinglah jong ki ban khur ïaki takma haki jingïalehkai bapher bapher bad kum ki nongïalam jong ka RBDSA kaba ju peit ïaki kam ïalehkai hapoh ka District ki pynpaw ba ki sngew dei eh ban pynlong ïa kane ka program pynkup burom kyrpang eh naka bynta jong ki.
Ha kane ka sngi ka Dr. M Ampareen Lyngdoh Myntri ka sorkar jylla ka la wan ban shimbynta kum ka kongsan, haka jingdon ryngkat lang u Bah John F Kharshiing, Working President ka MSOA, Bah Mayralborn Syiem, MLA ka Nongpoh, Charles Marngar, MLA Mawhati, Bah HM Shangpliang, Bah RB Shadap President ka RBDSA bad kiwei kiwei ki riew rnagbah bad ki nongïalam ba hakhmat ka RBDSA.
Ha kane ka sngi nalor ki heh ki haiñ la wan ban ïadon lang ruh ki arngut ki thei ïalehkai kiba la pawnam haka jylla kiba kynthup ïaka kong Margareth Pathaw, International Gold Medalist ha ka jingïakop ïakhun kti bad I Sr. Rose Mary Lyngdoh, National Rural Game Gold Medalist haka jinglehkai Javelin Throw.
Ka Kong M Ampareen Lyngdoh haba kren ha katei ka sngi ka la ai jingïaroh ïaki nongïalam ka RBDSA ba ki la lah ban ai burom ïa baroh ki samla ïalehkai kiba la kyntiew ïaka nam jong ka District bad ïaka jylla hi baroh kawei da kaba kyntu ruh ïaka RBDSA ba kam dei ban ih noh ïaki khun samla kiba don hapdeng ka jingïalehkai hynrei ki dei ban kdup ïaki khnang ba kin lait naka jingïaid sakma haka lynti ïaid jong ki.
Nga tip ba kum ka association ki don bun ki jingeh haka lynti ïaid jong ki ban btin lynti ïa baroh ki nongïalehkai hapoh ka District, hynrei kum ka Myntri jong ka sorkar kala kular ban ïarap katba lah ban ïa kren sha ki bahalor ïaki jingdonkam jong ka Association bad ban pynsting ruh ïaki jingeh jong ki nongïalam ka association.
Kala kyntu ruh ïaki khun samla ba ki dei ban ïai tur shakhmat haka lynti iaid jong ki kum ki nongïalehkai dakaba ong ba lada phi thrang ba phin nangkiew sha khmat haki kam ïalehkai, ka jingtrei shitom ka jinglen lade ban poi shaka thong ryngkat ka akor ka burom ka dei kaba kongsan eh.
Shuh shuh ka kong Ampareen ka la ong ruh ha u snem u ban wan ka Meghalaya Game kan long sha Jaiñtia Hills bad ka district Ri-Bhoi ruh kan sa ioh ïaka ka bynta ban pynlong ïa kane ka lympung kaba heh bad naka liang ka sorkar kan hap ban phai khmat ruh sha Ri-Bhoi ban pynbit pynbiang haka ba ïadei bad ki tiar ïalehkai bad ki madan ïalehkai bad kan long ka jingjah burom ïaka sorkar lada kam lah ban pynbit pynbiang ïa kine baroh yn da la dei ka pali jong ka Ri-Bhoi ban pynlong ïa kane ka lympung kaba heh hapoh ka jylla.
Kala ong ruh ba kane ka sorkar mynta ka dei ka sorkar kaba don ïaka jingthmu ban kyntiew ïaki kam ïalehkai sports bad mynta ka dang don ha pdeng ka jingïaleh ban pynbit pynbiang ïaki jaka ïalehkai ha man ki District kala bynrap.