Shillong, Nailar : Ka Phudmuri Presbyterian Higher Secondary School, Mawlai ha ka sngi Balang ka 17 tarik u Nailar, 2022 ka la pynkup burom ïa 87 ngut ki khynnah ki ba pass ha ka SSLC bad HSSLC jong snem u 2022 ha hall jong ka skul ha ka jingdon ryngkat jong ka Kong M. Lyngwa, District School Education Officers, East Khasi Hills District kum ka kongsan.
Napdeng kitei ki 87 ngut, 74 ngut ki dei kiba pass matrik (SSLC) bad 13 ngut ki samla pule ba la pass ia ka klass 12 (HSSLC).
Haba ai jingkren ka kong Lyngwa ka la pynpaw ba ki don saw tylli ki shabi jong ka jingjop ha ka jingpule, kaba nyngkong ka jingduwai, kaba ki dei ban duwai manla ka sngi, la phi khlaiñ ne phi shitom ruh, phin ïoh khur ïa ka jingjop, kaba ar ka akor, kaba lai ka mon bajwat ne bakhlaiñ (will power) bad basaw ka jingtrei shitom.
Ka la pynpaw ruh, ba ka la ktah bha ïa ka mynsiem jong ka haba ka principal bad ki nongïalam skul ki la wan khot sngewbha ïa ka sha kane ka prokram pynkup burom.
Ka la pynpaw ïa ka jingsngewkmen ban ïoh ban ithuh ïa ki khynnah kiba pass da kaba pynkup burom ïa ki bad ka la pyrto ïa ka jingtrei shitom ki nonghikai, ki kmie ki kpa kiba la kyrshan ïa la ki khun, ba khlem ma ki kan ym urlong kane ka sngi.
Nalor kata ka la kren ruh halor ki khynnah ki ba la pass, ïa kaba ka la ong ba ki don arjait, ki ba pass matrik ki dang hap hapoh ka jingkhmih jong ka skul, katba kiba la pass ïa ka klas 12 ki la ïoh ïa ka mon laitluid ban pynrulong ïa ki angnud bad ki jingphohsniew jong ki, kiei ki kwah ban long ha ka jingim jong ki.
Shuh shuh la pyniphuh iphieng ïa kane ka sngi da ki jingrwai na ki khynnah ha ka jingdon ryngkat ka principal jong ka skul ka kong Phila Rynjah, ki pastor, tymmenbasan, ki dkhot ka skul managing committee, ki kmie ki kpa, ki khynnah skul bad kiwei kiwei.
Ha kane ka sngi la ioh ruh ïa ka jingkren na ki samla pule kiba la pass na kane ka skul bad kiwei pat.
