Mawkyrwat, K’lyngkot 08 : Kum shibynta jong ka jingaimynsiem na ka bynta ki khun samla jong ka Kur, na ka liang ka Kur Snaitang ha ka jingïalang jong ka jingïakynduhlang jong ki saw tylli ki Zone kata na Raibah, Mawkyrwat, Shillong bad Nongstoiñ Zone ba la long hapoh ka Nativity Auditorium, Mawkyrwat, South West Khasi Hills District ka la ïoh ban pynkup burom da kaba ai da ka khusnam ne Award ïa ki 17 ngut ki khun samla jong ka kur.
Lah ban kdew ba ka jingaikhusnam ka dei namar ki khun samla jong ka Kur ki la leh bha ha ki eksam bapher bapher bad kumjuh ruh ïa ki samla kiba don ki sap kyrpang kum ha ki bynta jong ka rwai ka siaw. Shuh shuh ym tang kata ha kane ka jingïalang kum ka Kur Snaitang ka la ïoh ruh ban pynthymmai ïa ki nongkitkam jong ka Kur Snaitang Central Body ki ban sa treikam hapdeng ka snem 2024 – 2027 ha kaba u bah W.L. Snaitang kum u President bad u bah Ehkupar Snaitang kum u General Secretary bad ïa ki la pynskhem bad pyntian smai da u Rev. K.G. Snaitang.
U bah W.L. Snaitang kum u President jong ka Kur Snaitang Central Body haba kren ha u nongthoh khubor hadien ka jingïalang u la pynpaw ka jingaikhublei ba kyrpang ïa baroh ki para kur kiba la wan poi sha ka jingïalang bad kyrpang ruh ïa kito ki bym shym la lah ban poi ruh hynrei kiba don ka mynsiem jong ka jingïasnohktilang ban pyntyllun ïa ki kam jong ka kur. U la ïathuh ruh ba ha kane ka sngi, kum ka Kur Snaitang da ka mynsiem jong ka jingpynshlur ïa ki para kur kham kyrpang ki samla kiba lah bha ha ki eksam bad kiba don ki sap kyrpang ka la ïoh ban ai da ka khusnam ne ka award na ka bynta jong ki.
Ym tang kata, u la pynpaw ruh ba ban pyntyllun kham janai shuh shuh ïa ki kam jong ka kur kum ka jingïakynduh lang jong ki saw tylli ki zone ha katei ka jingïalang, ki la ïoh ban pynthymmai ïa ki nongkitkam jong ka samoi treikam jong ka snem 2024 haduh 2027 ha kaba ïa ki la pynskhem da ka jingsakhi lang jong baroh ki para kur na kylleng ki Shnong.
Kiwei de ki program kyrpang ha kane ka sngi ki long ka jingrwai na ka samla Relisha & Luckydora Snaitang bad na ka samla Memmillilen Snaitang.
Ïa ka jingïalang ha kane ka sngi la pynïaid da u bah K.H. Snaitang, Acting President jong ka Kur Snaitang bud sa ka jingduwai na u bah Bokstar Snaitang, ka jingkren pdiang na u bah G.A. Snaitang, President Kur Snaitang Mawkyrwat Zone bad jingkren pynkut na u bah S. Snaitang, bad jingkyrkhu pynwai na u bah M. Snaitang.
