Nongpoh, Jymmang 24: Ka Dorbar Shnong Nongthymmai, Raid Madan Kyrdem, ha ka sngi Saitjaiñ ka la pynkup burom ïa u Samla Evanshan Nongrum, u ba la wanrah burom ym tang ïa ka shnong hynrei ïa ka District hi baroh kawei da ka jinglah jong u ban poi shaduh ka kyrdan kaba ar napdeng ki 20 ngut ba paw ha ka result SSLC 2025 kaba la pynmih da ka MBOSE.
Ka jingleh burom jong ka Dorbar Shnong ka dei ka dak ban pynpaw ïa ka jingsngew sarong bad ka jingkmen halor katei ka jingjop jong u samla, kaba long ka nuksa ban ai mynsiem ïa kiwei pat ki samla ba kin trei shitom bad long la kloi ban wanrah burom lyngba ka kam pule puthi.
U Samla Evanshan Nongrum u dei u khun jong ka Kong Rose Mary Nongrum bad u Bah Wallking Lamare, na ka shnong Nongthymmai, Raid Madan Kyrdem, Ri-Bhoi District bad utei u samla u la ïakhun ïa ka eksamin SSLC na Sacred Heart Boys’ Higher Secondary School, Shillong bad lyngba ka jingtrei shitom bad ka jingminot jong u, u la ïoh ruh ban haduh ba kyrdan ba ar jong ka thup top 20.
Ha ka jingïalang pynkup burom ïa utei u samla, la sakhi lang da u Bah Cornelius Laloo uba long u nongthoh khubor bad u samla rangbah na katei ka shnong kum u kongsan ha ka jingdonlang u Bah Rishan Nongpluh, Pherlus Mawroh Rangbah Shnong, Kong Jerissina Muktieh President Seng Longkmie, Tbn. H. Kharsaiñ bad Tbn. H. Kharsohnoh, nalor ki khun samla jong ka shnong kiba la wan ban ai jingkyrshan bad jingïaroh ïa u samla Evanshan.
Kane ka jinglah jing utei u samla ban poi shaduh ka kyrdan ba ar haka result SSLC ka long ruh ka jingjop kaba khraw bad ka histori ïa ka shnong Nongthymmai, Raid Madan Kyrdem.
Haba kren ha katei ka sngi na ka liang u Bah Cornelius Laloo kum u kongsan u la ai ka jingïaroh ïa utei u samla u ba la poi sha katei ka thong bad kyrmen skhem ba katei ka jingminot bad ka jingtreishitom jong u kan neh ha lynter ka jingim kaba u dang bteng ban pule khnang ba baroh ki jingangnud jong u kin poi sha ka thong.
U la ai mynsiem ruh ïa ki khun samla ha katei ka sngi ban bud ïa ki nuksa, ban long kiba ïa ïeid ïatylli bad long kum shipara, khamtam ba kum ki khun samla ki dei ban long kiba stad ha kine ki sngi ba mynta ba dap tang da ki jingpynshoi bad ki jingpynthame ba bun jait naduh ki samla kynthei haduh ki shynrang ha kaba u la sneng la kraw ïa ki ba kin tip ïa u Blei bad burom ïa kiba halor ha kane ka sla pyrthei.
