Pynksan nia ki 6 ngut ki kyrtong ha ka ‘Common Platform’ ba la pynlong ha Mawlangwir
![](https://mawphor.com/wp-content/uploads/2023/02/kyrtong-1.jpg)
Mawkyrwat, Rymphang 22: Kum shibynta ban pynsngew bad pynshai paidbah ïa ki jingthmu jong baroh ki kyrtong kiba hapoh jong ka 36 – Mawkyrwat Consti-tuency, na ka liang ka Dorbar Shnong Mawlang-wir, South West Khasi Hills District mynta ka sngi ka la ïoh ban pynlong da ka common platform ne ka jingpynwan lang shi jaka ïa ki baroh ki kyrtong kiba thmu ban ïa khun ha kane ka MLA Election 2023 ba kin pynsngew ïa kaei kaba ki don ha ki jingangnud ban pyntreikam ne manifesto jong ki.
Ki kyrtong kiba la wan poi ha kane ka jingïalang ki long 6 ngut na ka 7 ngut kata u bah Carnes Sohshang na ka Indian National Congress (INC), u bah Sounder Strong Cajee na ka All Meghalaya Trinamool Congress Party (AMTCP), u bah Renikton Lyngdoh Tongkhar na ka United Democratic Party (UDP), u bah H. Stalyne Diengdoh na ka National Peoples’ Party (NPP), u bah Banpynskhemlang Wahlang na ka Independent (IND) ne kyrtong shimet bad ka kong Bity Jyrwa na ka Bharat Janata Party (BJP) (ba la phah bujli da u nongbud jong ka ba un pynsngew ïa ki mat bad jingthmu jong ka party) bad ïa ka jingïalang ha kane ka sngi la pynïaid da u Myntri Shnong Mawlangwir, u bah N.S. Wanniang bad ka jingkren pdiang na ka kong M. Marweiñ, nongkitkam jong ka Seng Kynthei Shnong Mawlangwir.
Haba kren ha ka jingïalang, u bah Banpynskhemlang Wahlang u kyrtong shimet ne IND uba la shim ïa ka bynta ban kren nyngkong u la ong ba um kwah ban kynthoh ei ei ne kular ei ei ha ki paidbah hynrei ka shong eh ha ka jing-i-mon jong ki paibah ban jied bad ha ka jingïaleh hi yn don beit uba jop bad uba rem namar lada ïa leh 7 ngut uwei un jop bad kiwei pat kin long kiba rem. Ha kajuh ka por u la pynpaw ba lada u poi sha ka thong jong ka jingjop, u kwah ban don ka jingsynshar kaba hok ha ki liang baroh bad khlem da ñiew shiliang khmat ïano ïano ruh.
U bah Sounder Strong Cajee u kyrtong na ka AMTCP u la ong ba lada ki paidbah kin kynmaw ieit ïa u bah Rowell Lyngdoh (bam kwai ha dwar U Blei) uwei na ki ‘riew rangbah jong ka dong ka thaiñ uba la leh shibun bah ki kam, to kin ïa ñion ha ka shap kaba don ar tylli ki syntiew ha kane ka 27 tarik mynta u bnai kaba dei ha ka party TMC bad ong ruh ba lada ki kwah ïa ki jingkylla ki dei ban ai ka jingkyrshan ba pura. “Ka thong kaba hakhmat eh jong ka All India Trinamool Congress Party (AITCP) ka long ban rad-dyngkhong ïa ka jingduk, ban hikai ïa ki paidbah ba kin lah ban ïeng ha la ki jong ki kjat, ban kyntiew ïa ka ïoh ka kot, ban pyntreikam ïa ki lad jingmyntoi hadien ka 100 sngi ba ynda ka party ka wan ha ka bor kata ka long na ka bynta ki kynthei bad ki samla lyngba ka WE Card bad ka MY Card bad ka 10 hajar tyngka ban ai jingkyrshan na ka bynta ki nongrep”, pynpaw u bah Sounder. Kawei pat ki thong u la kren ba dei ban ithuh noh ïa ka ktien khasi ha ka khyrnit kaba 8, ban pynduh pyndam noh ïa u pud u sam ba la dep ban ai sha ka Assam bad ban pyndam noh ïa ka aiñ khalai kaba la mih ha kine ki khyndiat bnai.
U bah Carnes Sohshang u kyrtong jong ka Indian National Congress (INC) u la ïathuh ba lada ka congress ka wan ha ka bor, ka jingthmu ba hakhmat ka long ban ïarap na ka bynta ki longïing jong ki ‘riew kynthei ban ai T. 3 hajar tyngkat shibnai, ki longïing hapoh jong ka Jylla kin nym mad shuh ïa ka jingpynlip ïa ka bording, ban thaw lad ban pynïoh kam uwei u briew na kawei ka longïing ha baroh kawei ka jylla bad ban ai ïa ka jingsynshar ha ka jingkhuid jingsuba ban lait na ki jingbam sap.
U bah Renikton Lyngdoh Tongkhar u kyrtong na ka UDP u la pynpaw da kaba ong ba kiba bun ki paidbah ha kane ka kynti ba mynta ki kwah noh ba ki party riew lum kin ïoh ban synshar ïa ka jylla Meghalaya bad kane ka sakhi ha kylleng ki jaka. Ha ka kot jingkyrpad (Appeal) na ka liang ka UDP ka la ïoh ban buh, u bah Renikton ula ïathuh ba ki don shibun buh ki thong hynrei ki thong kiba hakhmat eh ki long ki lynti ki synkien, ka umbam umdih, ka koit ka khiah, ka pule ka puthi, ki lad ai kam ai jam, ban wanrah ki ophis treikam bapher bapher, ki power project bad ki lad kamai kajih.
U bah H. Stalyne Diengdoh u kyrtong jong ka NPP u pat u la ong ba ym kwah ban kdew kti ïano ïano hynrei ka phang ka long ban pynsngew ïa ki jingthmu jong ka NPP ban pyntreikam lada ka poi sha ka thong jong ka jingjop kata ka long ban kyntiew ïa ka rep ka riang, ki lynti ki synkein kiba paka, ban wanrah ki jingtreikam ba pura hapoh ka 100 jingthiah, ban kyntiew kyrdan ïa ka Shngimawleiñ Sub Centre sha ka PHC bad kiwei de ki jaka sumar, ka pule puthi ba paka, ban pyntreikam pura noh ïa ka ITI, ban kyntiew ïa ka kam jngohkai pyrthei, ki ophis treikam ba pura jong ka sorkar bad kiwei de ki jingthmu.
Namarkata, ki la buh ka jingkyrpad ba ha ka 27 tarik u Rymphang, 2023 kin ïa mih paidbah ban ïa ñion ha la ki jong ki jong ki symbol ba ki ki la don jingmut lypa kata ha ka dur jong ka kti (INC), ki ar tylli ki syntiew (AMTCP), ka bom (UDP), ka kot (NPP), ka bol bad u briew (IND) bad kumjuh ruh ha ka dur jong u syntiew (BJP).