Nongstoiñ, Risaw 3: Ka Federation of Khasi Jaiñtia & Garo People Langpih Area Unit, kawei na ki shnat treikam jong ka seng kaba ju kit ïa ka khia ka shon ki jingeh jong ka dong ka thaiñ khamtam ka jingeh ki paidbah ba shong ha ki thaiñ border, ka kitbok kit rwiang ïa ka Sorkar MDA ha ka jingïalam jong u CM u Conrad K.Sangma, ba kan lah ban pynurlong shisha ban pynbeit noh shisyndon ïa kane ka jingeh jong ki paidbah ba shong ha ki thaiñ border kiba la shah iehnoh beiñ baroh shikatta ki snem.
U CM bad ka Sorkar MDA hi baroh kawei bad baroh ki MLA ki dei ban skhem ha la ka nongrim ban pynbeit ïa u pud u sam, katkum ki nongrim jong ki it ki hima bad ka KHADC lem bad ka jingdon jong ki jaidbynriew Khasi bad Garo ha ka thaiñ. Lada kan jia ka jingwan jurip na ki ar liang sorkar, ka jingjurip ka dei ban long na Komphaduli sha Umkiam.
“Ki don shibun hangne hangtai kiba khwan bor bad kwah burom ha kaba ïa dei bad ka border issue, hynrei ngi kyntu ïa u CM ba don burom bad ka sorkar MDA ban ïaid beit sha khmat ban pynurlong ïa kane ka kam ba bha bad donkam tam na ka bynta ki paitbah ka dong ka thaiñ”, ong kyrwoh bad bynrap, “Horkit hordang ngi ka seng ngim kwah da lei lei ba ki shnong Khasi bad Garo kiba don ha ka thaiñ Langpih kin leit sha Assam”.
