Hadien ka jingkhang ba 3 bnai na ka jingshah pynjot ha ka mariang, ynsa plie noh ïa ka ‘Hot Spring’

0

Mawkyrwat, Risaw 3: Hadien katto katne bnai jong ka jingkhang shipor ïa ka ‘Hot Spring’ na ka daw jong ka jingshah pynjor ha ki bor jong ka mariang ha ka 16 tarik u Jylliew, 2022, na ka liang ki nongpeit ïa kane ka jaka mynta ka sngi ki la ai ka jingpyntip ba kin sa plie noh shen khnang ba ki paidbah kin ïoh ban pyndonkam ha ka ban wan sum ha ‘Hot Spring’, South West Khasi Hills District.
U Mawphor haba ïoh ban ïa kren bad u bah Bungsing Sohphoh, uba peit ïa ka ‘Hot Spring’ u la pynpaw ba ha kine ki bnai kiba la leit noh, ki la don shibun ki jingïakynduh jingeh khamtam eh ban pynbha pat ïa kiba la shah pynjot namar ka jinglut ruh ka la long kaba bun ha kaba naduh ka jingkieng la hap ban shna pynbha naduh ki jingker bad kiwei de, ki tin tap, ki jingkhang bad kiwei de kiba ka um saw ka la rong. “Watla ka jingduh jingkyrmen ka don, hynrei hapdeng kita baroh, nga la long uba ïai shah ban pynbiang lut ïa ki jingdonkam khnang ba ki paidbah kin ïoh ban pyndonkam noh ha ka por kaba biang eh”, u la ong bad bynrap ruh ba naduh ka 4 tarik u Risaw, 2022 ynsa plie paidbah noh khnang ba kin paidbah na kylleng ki jaka kin ïoh ban pyndonkam kumba ju long.
Namarkata, ka jingkyntu ka long ba ki paidbah, haba ki wan sha kane ka jaka sum, ki dei ban sumar khuid bad wat nym bret pathar ïa ki jakhlia jakhlait bad bud ryntih ruh ïa ki jingbthah jong ki nongpynïaid khnang ba kan nym don kano kano ka jingshah kynnoh. “Kano kano ka kam ka donkam eh ïa ka jingïatreilang jong baroh khnang ban wanrah ïa ka jingbha ha kiba bun ki liang khamtam eh ha ka liang ka khuid ka suba jong kane ka jaka”, u la ong.

Leave A Reply

Your email address will not be published.