Nongstoiñ, Nailur 02 : Uwei u khynnah samla u ba la tip kyrteng kum u Ardor Marbaniang 17 snem ka rta, khun jong ka kong Thrisfulness Marbaniang bad u bah Wanshemlin Nongbri kiba shong ba sah ha ka shnong Ladweitang Nongstoiñ West Khasi Hills District, un mihkhmat ïa ka jylla Meghalaya na ka bynta ban leit aireng sha ka lympung ka jingïalehkai Badminton, kaba la tip kum ka North East Zone Inter State Badminton Cham-pionship 2022, ka ban long shen ha ka nongbah Agartala jong ka jylla Tripura mynta u bnai Nailur 2022.
La ong ba utei u khynnah u la sdang ban ïalehkai ïa katei ka jaid jingïalehkai, naduh ka por ba u dang kynjoh sha ki rta kaba dang 10 snem ei ei, da ka jinglam lyngti jong kiwei. Suki pa suki hadien ba u la kham tbit bad utei u khynnah u la ju ïoh ruh ban khur ïa ka nam lahduh, ha kum katei ka jingïalehkai kaba la pynlong ha sor Nongstoiñ bad ha ka District ruh kumjuh.
Utei u khynnah hadien ba u la paw bha ha ka District u la ïoh ruh ban mihkhmat ïa ka District sha ka Meghalaya Games 2022 bad u la ïoh ban khur ïa ka Bronze medal ha ka thup Under 19 single Badminton Championship Meghalaya Games 2022. Mynta ka kynti u dang pynleit jingmut bha ha ka ban kilan met na ka bynta ban leit aireng sha katei ka lympung kaba dei na ka bynta ki jylla Lam mihngi.
Ha ka jingïakren bad u nongthoh khubor, utei u khynnah samla u la ïawer bad kyntu ïa ki samla ba kin pynmlien ha ki jingïalehkai bapher bapher, khnang ba kin lait na ki jingdih pynbuaid bad ba kan long ruh kum kawei na ki lad kamai ja kpoh ïa ka lawei jong lade ong u Ardor. Haba bynrap ban pynkut ïa ka jingkren u la ong lada ki samla ki sakma noh ha ki jingmlien kaba sniew shaei kan poi ka jaidbynriew, namar ngi ki samla ngi long ka lawei jong ka Ri.
