Pynkhreh shait shait ka WKHD ïa u jumai bah

Nongstoiñ, Lber 20: Kum shibynta ha ka jingpynkhreh jong ka District lada jïa ba wan lyngshop u Jumai ha kano kano ka por hapoh ka District, ha ka sngi Palei ka State Disaster Management Authority (SDMA) Meghalaya Shillong, ha ka jingïatreilang bad ka National Disaster Management Authority (NDMA), Ministry of Home Affairs, Government of India, lem bad ka District Disaster Management Authority (DDMA) West Khasi Hills, ki la lah ban pynlong ïa ka ‘Mock Drill Exercise on Earthquake 2025’ ha ki jaka kiba hap hapoh Nongstoiñ Block kumjuh ruh hapoh Mawshynrut Block.
La sdang ïa kane ka prokram ha ka por 9: 30 mynstep ha ki bynta kiba pher bapher jong ka Nongstoiñ, kynthup ïa ka Civil Hospital, Market Complex, NRL Petrol Pump, surok Bye Pass Nongstoiñ Tura, St Francis HSS School, Siejlieh.
Ha kane ka Mock Exercise la ïohi ïa ka jingshimbynta shitrhem jong baroh kynthup naduh heh Sorkar, ki nongshong shnong ka thaiñ Nongstoiñ, ki Volunteer kynthup ïa ki khynnah NSS, Apda Mitra Volunteer bad kiwei kiwei kiba la pyndep ïa la ka jong ka kamram ba la bynshet ha ki.
Na ka liang U Deputy Commissioner cum Chairman DDMA, West Khasi Hills District, u la pynpaw ka jingkhublei ïa baroh kiba la ïadon bynta lang ha kane ka Mock Exercise. Khamtam eh ïa ki paidbah kiba la ïoh jingmyntoi shibun halor ki jingtip, kumno ki dei ban leh lada jia ka jingkhih jumai kaba kynsan kynsan ha kano kano ka por bad ha kano kano ka jaka.
Lyngba kane ka Mock Drill Exercise kan long ka jinghikai sha baroh ba ki dei ban pynkhreh barabor khnang ban ïada ïalade bad ïa kiwei ruh kumjuh haba wan lyngshop ki bor mariang.