Pynkhreh shaid shaid ka PDF ban sei da ki kyrtong thymmai na Mylliem bad Umsning Constituency

Shillong, Nailar, 20: Kum ka jingpynkhreh ïa ka elekshon ka ban sa long ha u snem 2023, ka seng saiñpyrthei Peoples Democratic Front (PDF) ha ka sngi Saitjaiñ ka la pynlong ïa ka Triennial Conference ban ïathir ïatai na ka bynta ban pynkhlaiñ shuh shuh ïa ka Party ha ki Zone bad ki Circle.
Ha kane ka jingïalang, ka party ka la pynkhamti ha u Bah Gavin Miguel Mylliem kum u President ba thymmai hadien ba ïa kane ka kam nongïalam ba hakhliehduh jong ka party la bat baroh shikatta da u Bah Banteidor Lyngdoh kum u Acting President hadien ka jingiehnoh kam jong u Bah Pynshngaiñ N. Syiem.
La sakhi ruh ba arngut ki MLA jong ka party kiba kynthup ïa u Bah Hamletson Dohling bad u Bah Jason Mawlong ki la jah rngai na ka jingïalang. Kane kam dei shuh ka sien ba nyngkong ba kine ki arngut kin sdang ban kiar na ki jingïalang ka party hadien ba ki la sdang ban pynïajan ïalade sha ka National Peoples Party (NPP) kaba ïatreilang bad ka PDF ha ka kynhun Meghalaya Democratic Alliance (MDA) kaba bat ïa u lakam synshar ha ka jylla.
Ha ka jingïakren bad ki lad pathai khubor hadien ba la wai ka jingïalang, u Bah Gavin M. Mylliem u la ong, “ban ïoh ïa ka rai kaba thikna ngin hap ban kylli hi na ki (Bah Hamletson bad Bah Jason). Na ka liang jong ngi, ngi ladep phah ïa ka jingpyntip sha ki ban don kane ka jingïalang jong ka Triennial Conference kaba ngi la pynlong shisien lai snem.”
Haba bynrap halor kane, u Woring President u Bah Banteidor u la ong, “ngim kano kano ban ktah shimet ïano ïano, dei na kata ka daw ba kaei kaba donkam ngi ladep pyntip hynrei kata pat ka shong ha ki kumno ban rai.”
U la pyntip ruh ba ka Zonal Committee jong ka PDF ha Mylliem bad ha Umsning Constituency ki dang im bad ki dang khlaiñ.
“Ym baroh (ki nongbud) shaba leit kita kin ïa leit lang lada ki la shim ïa ka rai kaba khatduh. Haduh mynta hi ka Zonal Committee ha kine ki ar tylli ki Constituency ka dang khlaiñ bha bad ngi dang treikam,” u la ong.
Haba kylli, hato kane ka jingleh jong kine ki arngut ki MLA ka PDF kan thoh neem sha u Lamphang jong ka Iingdorbar Thawaiñ, u Bah Banteidor Lyngdoh, u la pynshai, “lada ki la kren shai na ka liang jong ki, kin sa ngat beit ha ka aiñ kaba khang ïa ka jingkyntiap seng (10 Scheduled) jong ka Rit Synshar ka Ri India. Hynrei kumba ka long hi haduh mynta ngim pat ïoh eiei ïa ka rai kaba khatduh na ka liang jong ki,” bad bynrap, ka bha hi ïa phi ba phin kylli markhmat ba phin dup ïoh jingshai (na ki baroh arngut).
Halor ka jingkylli, hato ka PDF kan pan jingpynshai neem na kine ki arngut ki MLA kiba la shu pep jingïalang na ka por sha ka por tad haduh kane ka sngi, u Bah Banteidor u la jubab da kaba ong, “kane ka dei ka jingïalang kaba kongsan tam mynta ka sngi bad ha kiwei pat ki jingïalang ngim da ong than namarba ki don la ki jong ki kam ki jam bad kum ki MLA ki bunkam naba ka la dei ka samoi elekshon. Hynrei ha kaba ïadei bad kane ka jingïalang kaba la long mynta ka sngi, kum ka party ngin sa shong pyrkhat ba balei ki khlem wan.”
U la ong ba ka party kan sa shong pyrkhat la kan bujli noh neem ïa ka shuki Myntri hapdeng u Bah Hamletson Dohling bad u Bah Gavin Mylliem. “Ïa kane ka kam ka kynhun treikam kaba thymmai kan sa shong ban ïa pyrkhat ha ka Central Executive Council.”
Ha kaba ïadei bad ki jingdawa ba dang sahteng halor ka Inner Line Permit, ka jingpyrshah ban pynjari ïa ka Citizenship Amendment Act (CAA) ha Meghalaya, ka jingpyrshah ïa ka Lynti Rel, u Bah Banteidor u la ong, “ha ka por ba ngi la leit sha Delhi, ka party ka ladep pynpaw hakhmat u Myntri ka tnat Kam Pohing ka ri u Amit Shah halor ka jingdawa ban pyntreikam noh ïa ka Inner Line Permit (ILP) ha kane ka jylla Meghalaya, ban pyrshah ïa ka jingpynlong aiñ ïa ka Citizenship Amendment Act (CAA) bad kumjuh ruh ïa ka lynti Rel.
“Nalor kata, ka party ka la buddien ruh ha kaba ïadei bad ka jingpynsngew hakhmat u Amit Shah ba ka Sorkar India ka dei ban pynrung noh mardor ïa ka ktien Khasi hapoh ka khyrnit Baphra jong ka Riti Synshar ka Ri India,” u la ong.
Shuh shuh ha kane ka jingïalang, la bynshet ha u Bah Banteidor Lyngdoh kum u Working President naba baroh shikatta u Bah Banteidor Lyngdoh u shu long tang kum u Acting President jong ka party bad la thung ruh ïa u Bah Emlang Lytan kum u Working President.
Nalor kine, ïa ka kam Vice President la pynkhamti ha u Bah James Ban Basaïawmoit, u Bah Ivanlumlang Marbaniang bad ha u Bah Joseph Makdoh. Ïa ka kam Secretary la pynkhamti biang ha u Bah Auspicious Lyngdoh Mawphlang nalor kiwei kiwei de ki nongkitkam.
U Bah Gavin Mylliem u la ïathuh ba ïa ka thup kyrteng jong ki nongkitkam bathymmai ka Party yn sa phah sha ka Election Commision of India (ECI) khnang ïoh ïa ka jingithuh.
U la ong shuh shuh ba lyngba kane ka jingpynthymmai ïa ki nongkitkam, nangne shakhmat ka Party kan sa nang pynkhlaiÙ shuh shuh ïa ki Zonal Committee ha ki shnong jong ki District bapher bapher ka rilum Khasi bad Jaiñtia na ka bynta ban pynkhreh ïa ka Elekshon sha ka Ingdorbar Thawaiñ ka Jylla ka ban sa long ha u snem 2023.