Pynkhreh pynhap pyrda ka Mawrusyiar YCC ïa ka jingdap 50 snem, rah ka Pdengshong ïa ka lympung phutbol

Nongstoiñ, Risaw 30: Ka Mawrusyiar Youth and Cultural Club (MYCC), kaba dei kawei na ki sports club kiba ju trei shitom bad kaba la kham paw ha ka jingpynlong ïa ki jingïalehkai bad ki program bapher bapher, kaba la bat ruh ïa ka kyrdan jong ka Best Outstanding Youth Club Award jong u snem 2021-22 jong ka District bad ruh jong ka State level, ka la pynkut noh ïa ka jingïalehkai inter dong phutbol jong ka shnong Mawrusyiar.
Ha ka final jong ka phutbol kaba la long ha ka 28 tarik, ka Dong Pdeng Shnong ka la lah ban rah ïa ka nam jong ka jingjop hadien ba pynliem 2-1 kol ïa ka dong Mawsiang.
Ïa ka nam Best Player la rah da u Wanshailang Marweiñ, Best Goalkeeper da u Bulness Nongrem bad u Top Scorer jong ka Tournament la rah da u Friding Wannïang.
Ha kane ka sngi la ïa don bynta lang da u Bah Donboklang Marweiñ kum u Kongsan, u bah Sunshine Lyngdoh Sordar Shnong Mawrusyiar kum u Symbud Kongsan, Ki riew rangbah jong ka shnong bad ki paidbah kiba la wan ban sakhi lang ïa kane ka jingïalehkai.
Haba ai jingkren I bah Donboklang I la ïaroh ïa ki dkhot ka MYCC ba ki la lah shisha ban pynpoi ïa ka shnong, khamtam na ka bynta ka Youth Club sha ki nam bad ki burom ha kine ki snem ba la dep. I la ai mysiem ïa ka Sport Club Mawrusyiar da kaba kyntu ba kin dang pynkhaiñ shuh shuh ïa ki rukom treikam, ban dang shim ïa ki lad ki lynti ba ki player kin dang ïashim bynta ha ba bun ki rynsan jingïalehkai.
U la pynpaw ruh ba lyngba ka jingpynbyrngia bad ka jingshimkhia ki nongïalam ban pynlong ïa kum kine ki jingïalehkai, kan pyllait ïa ki khun samla na ki kam ba sniew khamtam na u drok u ba la jyllei bha ha kane dong bad ka thaiñ Nongstoiñ.
U la pynpaw ruh ba ka jingïalehkai ka dei ruh ka bynta jong ka koit ka khiah bad ba khambun na ki samla ki ju sngew tynnad ban ïa shimbynta ha ki jingïalehkai bapher bapher. U la kyntu ïa ki samla kiba dang don hapdeng ka jingpule, ba ka jingsngew tynnad jong ki ban ïalehkai ban pynpaw ïa ka sap ka phong kaba ki don ba kin kynmaw ba ka jingnang jingstad ruh ka long ka ba donkam bha bad ba ka dei ban ïaid ryngkat ryngkat bad ki jingpule.
Ha ba ai jingkren u General Secretary I Bah Lambor F.Wanniang I la pyntip ba ka Mawrusyiar Youth and Cultural Club kan sa kynjoh sha u Mawmer ba 50 snem ïa kaba la dep ban plie ha ka 7 tarik Kyllalyngkot 2023 bad kan sa pynkut noh ïa ka Golden Jubilee Celebration ha ka 6 tarik Kyllalyngkot 2024 lada ym don jingpynkylla shuh. U la pyntip ruh ba ki tnad treikam ki la pynkhreh bad ka MYCC kan pynmih ruh ïa ka Souvenir, ka Video Documentary kaba kyrteng ka ‘THE VIBRANT 50 GOLDEN YEARS’.