Pynkhreh ka Jylla ban phah biang sa shi kynhun ki doktor ba hikai pyntbit sha Tamil Nadu

Shillong, Kyllalyngot 09: Ka sorkar Meghalaya kala pynkhreh ban phah sa ïa kawei pat ka kynhun ki Doctor sha Tamil Nadu mynta u bnai na ka bynta ban pyntbit ha ka kam ban ai jingsumar kaba dei ka jingïatreilang hapdeng jong ki ar tylli ki jylla.
U Principal Secretary ka Koit ka Khiah u Sampath Kumar, ula pynthikna ïa kane ha ka jingïakynduh kaba dang shen da kaba banjur ïa ka jingïengskhem ka jylla ban pynkhlaiñ ïa ka jingai jingsumar ha ki thaiñ nongkyndong.
“Ngi dang pynkhreh ban phah sa ïa kawei ka kynhun hapoh jong une u bnai” la ong u Kumar.
“U Ram Kumar S uba long u Secretary ka Koit ka Khiah dang shen ula leit ïakynduh ïa u Additional Chief Secretary ka Tamil Nadu na ka bynta ban pynthikna ïa katei ka jingthmu”.ïa kane ka training program, la sdang lyngba ka jingïasoi ïa ka Memorandum of Understanding (MoU) ha u 2022 hapdeng ka Meghalaya bad Tamil Nadu, ban pynkup bor ïa ki doctor da ki sap kiba kyrpang ha kaba ïadei bad ka Comprehensive Emergency Obstetric Care, Life-Saving Anesthetic Skills bad ka Ultrasonography. Kane ka jingthmu ka long ban ïaid ryngkat bad ka Chief Minister’s Safe Motherhood Scheme (CM-SMS) bad ka thong ka long ban pynduna ïa ka jingiap ki kmie kiba pun khun ne ki khunlung kiba dang shu kha ha kylleng jong ka jylla Meghalaya.
U Kumar ula pynpaw ba kane ka prokram kala wanrah ïa ka jingkylla bad ula pyntip kumba 100 ngut ki doctor kila ïoh jinghikai pyntbit lyngba katei ka sienjam bad la buh ïa ki ha ki jaka kiba don ha kyndong bha jong ka jylla.
“Nuksa, ha Pynursla CHC, ngi lah duh noh ïa kawei ka kmie namar ka jingbym don ïa ki kor Ultrasound, mynta ngi lah don ïa ki Doctor kiba la tbit ha ka Ultrasonography,” ula ong bad ka bynrap, “Kane ka long ka sienjam kaba kongsan bha ha kaban pynïar ïa ka jingai jingshakri ha ka koit ka khiah ha ki jaka kiba donkam bha”.
U Kumar ula ïaroh ruh ïa ka kam kaba la leh da ki shnong ki thaw kum ki Village Health Councils kiba la kyrshan ban wanrah ïa ka jingkylla ïa ka jingai jingsumar ha ka jylla Meghalaya.
“Ki shnong ki thaw ki long ka bor ïa ka Meghalaya. Ha ka shnong Wahlyngdoh ka Village Health Council kala pynthikna ïa ka 100% ka jingkha ïa ki khunlung ha ki jaka sumar watla ka jaka ka long kaba bun bha ki riat. Ka jingtrei shitom ka jongki kala pynlong ban ïada ïa ka jingim briew bad kala pynduna bha ïa ka jingiap ki longkmie kiba pun khun” ula ong.
U Principal Secretary ula batai ruh ïa ki paralok kiba ïatreilang kum ka Bill & Melinda Gates Foundation bad ka Harvard University bad ka jylla Meghalaya ban kyntiew shuh shuh ïa ka jingai jingsumar.
“Ka Gates Foundation kala pynbiang shuh shuh ïa ki briew bad ïa ki riewshemphang katba ka Harvard dang shen kala buh jingthoh ïa ka jinglah ka jong ngi ban pynduna haduh 50% ïa ka jingiap ki longkmie kiba punkhun, kaba la wanrah ïa ka jinglong nongïalam bad ka jingïashym bynta ki shnong ki thaw halor jong kane ka jingjop” ong u Kumar.