Nongstoiñ, Lber 1: Ka Balang Presbyterian Nongkhlaw, Nongkhlaw Presbytery Nongstoiñ West Khasi Hills ka la pynkhreh shait shait ban pynkhreh ïa ka jingïaseng Samla KJP Synod Sepngi ka ban long ha ka 3 tarik haduh 5 tarik Lber 2023 hapoh ka Balang.
Ha u kyrwoh khubor, u Pastor GML Mawlot u ba peit ïa ka Balang Presbyterian Nongkhlaw, u la ong, “Na ka liang ka Balang ngi ai jingtip sha kiba wan jingïaseng naduh ki Pastor, ki dkhot, delegates bad ki paitbah, ba kiba mih ne wan na Shillong kan poi kumba 85 kilometer ei ei haduh Nongkhlaw. Kiba mih na Shillong kin ïaid na Shillong ter ter sha Mairang, Nongkasen sha lad kadiang (Surok Laitkseh) bad sha kamon na lad Laitkseh sha Mawkaton, Mawshong-khyndew, Mawsnarih sha Mynni mawbri, Jaidoh Mawthungkper (kynroh) NongKynjang haduh Nongkhlaw”.
“Kiba na Mawkyrwat kiba ïaid na Mawkyrwat lynti Nongstoiñ sha Rangblang sha Nonglwai sha Nongkhlaw kumba 40 kilometer. Kiba ïaid na Nongstoiñ kin ïaid na Nongstoiñ (kiew lynti Mawkyrwat) sha Nongjyllieh, Mawthung-kper (kynroh) sha Nongkynjang, shaduh Nongkhlaw kumba 13 kilometer”.
“Ha ka sngi U Trai ka 5 tarik Lber 2023, ha ka jingïaseng Paitbah na ka Balang ngi kyrpad ban nym shong palat pud, namar ka surok ka rit bad khnang ban lait na kino kino ki jingjia ba sngewsih”.
“Ka jaka pynlong jingïaseng paitbah ha ka sngi U Blei ka kham long lum, kumta ngi kyrpad ban wanrah kot ne jaiñ siang shong, ki kynthei lada phong juti jrong khong dong te ka kham shitom ngi ïathuh lypa ban lait naka jingur. Nangta ka jaka ka kham khrïat kumta donkam ki jaiñ ba kham syaid”.
“Kito kiba kwah jingtip bniah ïa ka shnong, phi lah ban wad na Google Nongkhlaw 793119, khnang ban suk namar kane ka shnong Nongklaw kam dei Nongkhlaw jan Mairang ka dei Nongkhlaw sha Nongstoiñ”, ong u Pastor.
