Shillong, ïaïong, 09: Ki Pulit jong ka nongbah Shillong ki la pynkhlaiñ ïa ka jingpahara hakhmat ka Ophis treikam jong ka Meghalaya Board of School Education (MBoSE), ha khmat ka St. Anthony’s School bad College bad ha skulbah NEHU hadien ba kawei ka kynhun kaba la tip kum ka Lawei ba Phyrnai ka la byrngem ban pynbthei bom ha kine ki lai tylli ki jaka ha kine ki khyndiat sngi ba la leit noh.
Kane ka jingbyrngem jong kane kynhun kaba kam ba ka don 37 ngut ki dkhot kiba dei ki samla kiba la nang la stad ki bym ïohkam ïohjam ka la pynsuhjer ïa kiba bun ki kmie ki kpa kiba phah skul ïa ki khun ha St. Anthony’s Higher Secondary School bad ha St. Anthony’s LP School, Laitumkhrah kiba don markhap.
Katkum ka shithi byrngem ba la phah sha u Myntri Rangbah ka Jylla u Conrad Kongkal Sangma lyngba ka email khlem jingsoi bad khlem ka kyrteng jong u nongphah, kane ka kynhun ka la byrngem ban pynbthei bom manla ka taïew da kaba sdang naduh ka 1 tarik, Jymmang, 2022 lada ka Sorkar Jylla kam wad ïa ki lad ki lynti ban aikam aijam ïa ki nongshong shnong ka jylla Meghalaya.
U nongthoh khubor uba la leit jurip ïa kine ki jaka u la lap ba ka Sorkar Jylla ka la pynkhlaiñ ïa ka jingpahara khnang ban ïada kano kano ka jingjia basngewsih kaba lah ban jia ha kano kano ka por ka bym poi pyrkhat.
Ha kaba ïadei bad kane ka jingbyrngem jong kane ka kynhun, ka tnat Pulit ka dang pynlong ïa ka jingtohkit kaba bniah.
