Pynkhlaiñ ka UDP ha Ri-Bhoi da ki nongkitkam ba thymmai

Nongpoh, Risaw 04: Kum ka jingpynkhreh ïaka elekshon sha ka iing dorbar thawaiñ ka jylla bad ban dang pynkhlaiñ ïaka party ha Ri-Bhoi District, ka party UDP mynta ka sngi kala pynlong ïaka General Council ban jied ïaki nongkitkam ba thymmai jong ka party haka district naka bynta ka samoi treikam jong u snem 2022-25 bala pynlong ha iing Dorbar ha Nongpoh.
Ki nongkitkam ba thymmai jong ka UDP Ri-Bhoi ki kynthup ïa u Bah Donbok Khymdeit kum u President, Bah Balajied Ranee MDC, Bah Sunshine Makri, Bah Donkupar Sumer, Bah Doris Sulein, Bah R.B. Shadap kum ki Working President, Ki Vice-president ba kynthup ïa u Bah Rocky Kylla, Bah Najim Kharmalki, Bah C.B. Syiem, Bah Elphin Kurbah, Bah Sensi Lyngdoh, Bah Baiahunlang Makdoh, General Secretary Bah Michael Kharhunai, Joint Secretary ki don san ngut ba kynthup ïa u Bah Runus, Bah Friday Jalong, Bah Biestar Sylliang, Bah Sranly Wahlang, Bah Pynskhemborlang Sun, Treasurer kong Queen Merry Rymbai, Chief Organising Secretary Bah Diamos Syiem, Organising Secretary ba kynthup ïa u Bah Tiplem Lymphuid, Bah F. Aibor Syngkli, Bah Lasting Syiem, u Chief Adviser Bah Rafael Massar, Senior Adviser- Bah R.R. Makdoh, Bah Wick Marwein, Bah Ploster Syiem, Adviser-Bah B.S Teron, Bah Joywell Lyngdoh, Bah Witnes Syngkli bad kiwei kiwei ki nongkitkam.
Ïa kitei ki nongkitkam ba thymmai la pynskhem da u Dr. Jemino Mawthoh General Secretary ka UDP haka jylla haka jingdon lang ki nongkitkam ba hakhmat jong ka party bad ha katei ka jingïalang la pynbna ruh ïaka kyrteng ki 3 ngut ki rangbah kiba la pan tiket ban ïakhun ïa ka elekshon sha ka iing dorbar thawaiñ ha u 2023 na 3 tylli ki constituency, kata na Umsning ïa u Bah Sunshine Makri, na Mawhati ïa u Bah Baiahunlang Makdoh bad na Jirang ïa u Bah Badhok Nongmalieh, bad ïaki kyrteng jong ki la phah sha ka state UDP ban ioh ïa ka jingmynjur ai tiket.
Haba kren ha katei ka sngi naka liang u Dr. Jemino Mawthoh bad kiwei ki nongïalam ka party ha Ri-Bhoi kila pynpaw ba u snem 2023 un dei u snem jong ka party UDP bad khlem jingartatien ka party UDP kan ioh bun tylli ki seat wat ban synshar ïaka jylla ha kaba mynta ki dang pynkhreh bad pynkhlaiñ ïaki rukom treikam ban pynkhreh ïaka elekshon 2023.
“Ngim artatien ba ka party UDP kan wan haka bor ha u 2023, kumba ki paidbah ki don ka jingshaniah ha kane ka party riew lum ban synshar ïaka jylla naka bynta ban wanrah ki jingkylla bad khamtam ban wanrah ïaka roi ka par” la ong ki nongïalam da kaba kyntu ruh ïaki paidbah ba ki dei ban sngewthuh shai ba kum ka party ka don ïaka thong ban wanrah ki jingkylla lada wan haka born aka bynta ka jingbit jingbiang jong ki paidbah haka jylla baroh kawei.