Shillong, Lber 01: Ka Kynhun Ka Sur U Paidbah Hynñiewtrep ha ka jingïalang kaba kyrkieh kaba la long mynta ka sngi, ka la pynkhih ba mynta ka kynti dei ban wan Myntri Rangbah noh da u Khasi.
Haba ïakren bad ki nongthoh khubor, u Bah Erwin K. Sutnga, Adviser jong kane ka Kynhun, u la ong ba ka daw ba ka la pynkhih kumne kadei namar ba ka Garo Hills ka la ïoh Myntri Rangbah lynter la khatsan snem bad katkum ka Reservation Policy, ka la dei sa ka kylla jong u ki Khasi ban ïoh long Myntri Rangbah ka jylla.
U Bah Rastingwell Thabah, Chairman jong ka Kynhun, u la ong ba ha kine ki san snem baladep, ka jylla ka la mad bun ki jingeh ha ka jingsynshar jong ka MDA ki la bun ki jingjia kiba la pyndom bad pynsngewsih bad ki jingïakhih kiba bun naduh ki jingiakhih ki nongtrei sorkar, ki Seng bad kiwei kiwei.
U Bah Thabah, u la ong ba wat hapdeng ka jingmih ki Party bapher bapher, hynrei ki paidbah ki angnud ban don noh da u Myntri Rangbah na ka jaidbynriew Khasi bad kan shong ha ki MLA ki ban shah jied lashai ka sngi.
Na ka liang u Bah Seibor Lyngdoh, uwei na ki nongïalam ka Kynhun, u la kyntu ïa ki paidbah ban kyrshan lang ïa kane ka jingdawa jong ka Kynhun ban pynioh da u Myntri Rangbah Khasi. U la ongb kam pher la u wan na kano kano ka Party ruh kam lei lei, hynrei kaba donkam ka long ban ïai neh bad ym dei ban ïaknieh shuki, hynrei dei ban pynneh beit haduh san snem. U la ong ruh ba ki paidbah kidei ban tip lada don mano kano ba pynkhih ne pynkhyllem ïa ka shuki bad ki paidbah kidei ban ai jingsneng ïa kiba kum kita ha ka elekshon ban wan.
U la ong ruh ba ki paidbah ki kwah ba ka sorkar ban wan kadei ban ïaleh pyrshah ïa ka bamsap, ïa ki kam khalai bad ban pynbeit noh ïa ka jingkhaïi dewïong tuh ban ïaleh ban aikam aijam ïa ki samla bad kumjuh ruh ban ïaleh pyrshah ïa u drok.
