Shillong, Naiwieng, 07: Ka United Democratic Party (UDP) bad ka Hill State People Democratic Party (HSPDP) ha ka sngi Baar ki la pynim biang ïa ka Regional Democratic Alliance (RDA) na ka bynta ban pynkhreh ïa ka elekshon Lok Sabha ka ban sa long ha u snem ban sa wan.
Ka RDA ka la buh thong ban sei da u kyrtong mon lang na ka bynta ban pynïakhun na Shillong Parliamentary Seat.
U President ka UDP Bah Metbah Lyngdoh u la shah jied kum u Chairman jong ka RDA bad u President jong ka HSPDP u Bah KP Pangniang kum u Secretary jong kane ka kynhun. U nongïalam ba la rangbah jong ka HSPDP u Bah Martle Mukhim uba long ruh u MDC jong ka Mawkynrew u la shah thung kum u Co-chairman katba u President jong ka UDP East Khasi Hills u Bah Titosstarwell Chyne uba long u MDC jong ka Sohra Constituency u la shah thung kum u Assistant Secretary.
Ha ka jingïakren bad ki lad pathai khubor u Bah Metbah Lyngdoh u la ong, “na baroh ar tylli ki party ngi la mynjur ïa ki nongrim ban pynthikna ba ka RDA kan dang im bad ban trei na ka bynta ka bha ka miat jong ka party.”
“Ngi la rai ruh ban pynrung sa 11 ngut ki kum ki dkhot, ban sa jied na ki ar tylli ki party,” u la ong.
Une u nongïalam ka UDP u la ong, ha ki por ba la leit noh, ki ar tylli ki seng riewlum ki ju ïatreilang bad ban pynim biang ïa ka RDA la shimrai ha ka 30 tarik, Jymmang hadien ba la kut ka elekshon jong ka Iingdorbar Thawaiñ ka Jylla.
Haba kylli, u Bah Metbah u la ong, kiwei kiwei ki ishu kiba kynthup ïa ki kyrtong ban pynïakhun ha ka elekshon Lok Sabha yn sa ïakren ha ka jingïalang ka ban sa long jong ka RDA ka ban sa long shen. U la ong ba ha ka jingïalang ka ban sa long yn sa ïakren ruh halor ka jingpynkhreh ïa ka elekshon KHADC bad JHADC.
U Bah Pangniang u la ïathuh ba ka jingïalang ka la rai ban kynthup hynriew ngut ki dkhot na ka UDP bad san ngut na ka HSPDP khnang ban pynlong ïa ka RDA kaba biang pura ki nongkitkam. U la ong ba kine ki ar tylli ki seng saiñpyrthei ki la ïakren sani bha halor ka jingdonkam jong ki party ban shim rai kumno ban ïaid shakhmat na ka bynta ka jingpynkhreh ïa ka elekshon MP hapoh ka shatri jong ka RDA.
“Ngi la rai ha ka jingïalang mynta ka sngi ba ngin sa pyntip sha baroh ki dkhot jong ka HSPDP bad UDP bad ngin pynkhlaiñ biang ïa kane ka kynhun bad ngin sa ailad ruh ban ïathir ïatai na ka bynta ban pynkhreh ïa ka elekshon MP da kaba ailad ban ïakren shwa hapoh ka UDP bad HSPDP, u la bynrap.
Une u nongïalam jong ka HSPDP u la ong ba ka UDP bad HSPDP kan sa jied ruh ïa u kyrtong na ka bynta ka Shillong Seat bad ban tyrwa ruh hakhmat ka RDA shwa ban shim ïa ka rai na baroh ar liang.
“Ngim don jingpyrkhing ïa kano kano ka party ban sei ïa u kyrtong hynrei ïa ka rai yn sa shim lang da ka RDA lada u kyrtong u dei na ka UDP lane na ka HSPDP,” u la ong.
U Bah Pangniang u la ong ba kine ki ar tylli ki party kim don kano kano ka jingïatreilang shwa ka elekshon lane ka jingia bhah ïa ki Seat hynrei ka dei tang ka jingïasngewthuh jingmut ha ka elekshon 2023 bad kumjuh ruh ha ka MDC elekshon kaba la long ha u snem 2019.
Ha kajuh ka por, u Bah Pangniang u la ong ba ka UDP bad ka HSPDP kin sa ïathir bniah ha kaba ïadei bad ka elekshon MDC ha ki sngi ki ban sa wan.
