Shillong, Naiwieng 08 : Ka Dorbar Shnong Mawklot ha ka sngi Balang ka la pynkup burom bun ngut ki nongialehkai na katei ka shnong kiba la mihkhmat ia ka jylla ha ki jingiakhun bapher bapher.
Kane ka jingpynkupburom kadei ruh ha kajuh ka sngi ba ka Dorbar Shnong ka rakhe ia ka jingdap 25 snem ka jingshakri jong u Bah Mawkordor Nongneng kum u Rangbah Shnong.
Kine ki nongialehkai ki kynthup ia i Ilapynkmen Synrem ha ka jingialehkai Tennis. Ine i nongialehkai i la ioh ban mihkhmat ia ka jylla ha ka UTT 84th Senior National bad Inter State Table Tennis Championship 2022 kaba long ha Gymnasium Hall, University, Jammu. I la ioh ruh ia ka khusnam ba ar ha ka Junior Girls Doubles Event ha ka State Table Tennis Championship 2017 kaba long ha Hawakhana Indoor Sports Hall Tura.
I Shongkhiashisha Kharpan ba dei i nongsiat khnam i la ioh khur ia ka takma ksiar ha ka Meghalaya Games kaba long ha u snem 2019 – 20 ha ka thup Women Indian Round Individual Event kaba long ha Shillong ha u Rymphang 2020. I la leit ruh ban shim bynta ha ka North East Olympic Games 2022 kaba long ha Shillong ha u Naiwieng 2022 bad ioh ban khur ia ka takma rnong ha ka Indian Round Mixed Team Event.
La pynkupburom ruh ia u Shaiborlang Kharpan, u rangialehkai phutbol ba mihkhmat ia ka Shillong Lajong Football Club ha ka final Round jong ka Tournament Manchester United Premiere Cup,2010 kaba long ha Goa. Nalorkata, u la mihkhmat ruh ia ka Meghalaya ha ka Coca – Cola Sub-Junior National Football Championship – Mir Iqbal Hussain Trophy ha u snem 2009 ha Haryana. Nangta u la mihkhmat ruh ia ka jylla ha ka Subroto Mukherjee Cup Football Tournament kaba long ha New Delhi ha u snem 2009.
U la mihkhmat ruh iaka Shillong Lajong Football Club U-19 bad don bynta ha kaban rah ia ka nam lahduh ha u snem 2011 ha ka lympung ba pynlong da ka Shillong Sports Association.
I Janailin Kharpan i la shim bynta ha ka Meghalaya Games 2022 bad ioh khur ia ka takma ksiar ha ka Archery Indian Round Women Team Event. I la shim bynta ruh ha ka 27 NTPC Senior Indian Round, National Archery Championship kaba long ha JRD Tata Sports Complex, Jamshedpur, Jharkhand.
I Daiasngewhun Kharbudnah pat i la ioh ban mihkhmat ia ka jylla ha ka phutbol U-14 ha ka jingialehkai kaba long mynta u snem ha Punjab ha kaba ka ri ka la ioh ban wan ha ka kyrdan kaba lai.
Ia kine baroh la pynkupburom ha ryngkat ka jingdonlang u CEM ka KHADC Bah Pyniaid Sing Syiem kum u Kongsan, Paiem Ainam Manik Syiem, Syiem ka Hima Mylliem kum u Symbud Kongsan, u Chief Adviser jong u Myntri Rangbah, Bah Hamlet Dohling, Project Director ka DRDA, Bah PT Passah nalor kiwei kiwei pat ki heh sorkar, ki nongialam shnong ka Upper Shillong bad kiwei kiwei.
