Khliehriat, Naiwieng, 02: Ka Khasi Students’ Union (KSU) ha ka sngi Saitjaiñ ka la pynksa ïa kawei ka shnat treikam ha ki thaiñ khappud jong ka East Jaiñtia Hills District kaba la tip kum ka KSU South West Border Circle.
Ha ka jingïalang kaba la long ha ka shnong Huroi, East Jaiñtia Hills District Legal Affair Secretary jong ka KSU Seng Kmie u samla James Hitler Mawphniaw u la long kum u kongsan bad pynskhem ruh ïa ki nongkitkam bad ïa ki dkhot jong ka Circle kaba don ha shnong khappud.
Haba kren ha ka jingïalang u samla James Hitler Mawphniaw u la ong ba ka KSU kam ju don Circle khlem da don shwa ki Unit bad ki dkhot bad kane ka pyni ïa ka jingkhlaiñ jong ki samla.
U la ai mynsiem ruh da kaba ong, “to trei lyngba ka jinglen lade bad ka jingaiti met bad mynsiem namar mynta la suit la shor ïa kane ka Circle kaba thymmai, wat ai ba kan long kaba shu bet ïa u symbai ba un jlop noh tang shi samoi ar samoi hynrei ngi kwah ban ïohi ïa u ta u soh uba ka KSU ka la bet un long uba seisoh bad u soh uba bha.”
Ki nongïalam jong ka KSU South West Border Circle ki kynthup ïa u President Garnes Talang, Vice President Kampher Pohthmi, General secretary Wallamborlang Lamin Gadew, Organising Secretary Same Talang, Education Secretary Andrias Talang, Environment Secretary Samson Lamin, Finance Secretary Fourmon Sumer, Sports Secretary Mathues Tariang, Publicity Secretary Pynshngaiñ Lamin,Office Secretary Tarling Lamin Gadew bad arphew hynñiew ngut ki dkhot.
Ha kane ka sngi la ïa don ryngkat lang ruh u Assistant Finance Secretary Sengkmie, u Samla Ïashan Mukhim kynthup ruh ki nongïalam bad ki dkhot ka KSU East Jaiñtia Hills District Unit, u Waheh Shnong ka Borghat u Bah Kyrmen Swer, Waheh Shnong ka Huroi Bah Golden Marbaniang, u Waheh Shnong ka Hingaria Bah Samson Lamin bad kiwei kiwei.
La pynphuh pynphieng ïa ka prokram da ka jingshad bad jingrwai na ki samla ka thaiñ khappud.
