Shillong, Risaw, 22: Ka Bharatiya Janata Party (BJP) ka la pynsdang ïa ki rynsan ïalap Ilekshon da kaba pynlong ïa ki jingïalang ha ki 55 tylli ki Mandal Committee.
Ka thong kaba kongsan jong ka BJP ka long ban thaw ïa ki Booth Level Committee ba kin dup trei shitom na ka bynta ban pynjop ïa ki kyrtong ha ka Ilekshon sha ka Iingdorbar Thawaiñ ka Jylla ka ban sa long ha u snem 2023, la ong u State President ka BJP Meghalaya State Unit u Bah Ernest Mawrie.
Ha ki jingïalang ba la pynlong ha Mawkynrew, Pynursla, Rambrai, Ampati, Salmanpara, Songsak, Chokpot, Jirang, Nongpoh bad ha kiwei kiwei ki Mandal kiba ka BJP kam ju don ktem satia ha ki snem ba la leit noh bad ba la sakhi ruh ïa ka jingïashim bynta shitrhem jong ki paidbah.
Ha Nongthymmai bad ha Shillong East ka BJP ka bym ju don kyrtong ha ki snem ba la leit noh, hynrei mynta ka kynti la sakhi ïa ka jingïashim bynta jong ki spah ngut ki paidbah kiba la pynïasoh ruh ïalade kum ki dkhot ka BJP. Da ka jingtrei shitom, ka BJP ka la don bun ngut ki nongtrei bad pynkha bun tylli ki shnat treikam tang hapoh u bnai Risaw.
U Bah Mawrie u la ïathuh ba ka party kan sa nang pynkha shuh shuh ïa ki shnat treikam ha ki Mandal bad ki Booth Level bad ban sei da ki kyrtong kiba don ka lad ban ïoh ïa ka jingjop. U la ong ba ka BJP kan sa nang pynkha shuh shuh ïa ki shnat treikam ha rilum Garo namarba ka jingpynïasoh jong ki dkhot ka dang bun bha katba nang mih ki sngi.
U Bah Mawrie u la pyntip ruh ba u National President jong ka BJP u J.P Nadda u lah ban wan iuhkjat ha nongbah Shillong na ka bynta ban ïakynduh ïa ki nongkitkam jong ka party.
U la ïathuh la kumno kumno ha ka taiew bakhatduh jong une u bnai Risaw ka BJP ka la buh hakhmat ïa ka thong ban pyndep ïa ka jingpynkha ïa ki shnat treikam ha baroh kawei ka jylla.
“Yn sa pynlong ïa ka jingïalang ban pynshai paidbah ban pynpoi ïa ka BJP ha ka bor synshar,” u la ong.
“Ki nongïalam ka party ha ki jingïalang jong ki Mandal ki la pynpaw ba ha kane ka elekshon yn sa buh hakhmat ïa ki mat kiba kongsan kiba ïadei bad ki jingeh jong ki nonghikai, ka jingthylli ki kam sorkar ha ki tnat treikam, ka jingbym pyntreikam pura ïa ki skhim ka Sorkar Pdeng bad ki song jingïarap ba la ai sha ka Sorkar Jylla,” la ïathuh u Bah Mawrie.
“Ki nongkitkam jong ka party ki la trei shitom ban pynphriang ïa u kyrwoh ba dei tang ka jingsynshar jong ka BJP kan wanrah ïa ki kam pynroi ha ka jylla Meghalaya,” u la ong bad bynrap, “ ïa ki skhim bad ki song jingïarap yn sa lah ban pan na ka Sorkar Pdeng na ka bynta ka jingmyntoi jong ka jylla. Nalor kane, yn sa pynshai paidbah shaphang ki skhim ka Sorkar Pdeng hadien ba la pynkylla kyrteng da ka Sorkar Jylla da kaba shim kabu ban ïoh jingmyntoi saiñpyrthei.”
