Shillong, Nailar 12: Ki pulit ka North Garo Hills ki la nang pynjur ka jingkhynra bad ïakhun pyrshah ïa ka jingdih duma ne ban die ha ki jaka paidbah naba kane ka dei ka kam kaba beaiñ bad na ka liang jong ki kila ïoh ban lum ïa kumba 1,545 tylli ki challan bad lum ruh ka kuna T. 1.52 lak ha kine ki 2 snem hapoh ka Cigarettes and Other Tobacco Products Act (COTPA), 2003.
Kane ka jingleh jong ki pulit ka North Garo Hills ka la long kum kawei na ki lynti ba khlaiñ ban ïada bad pynduna ïa ka jingpyndonkam ïa u duma. Kane ka jingkhynra ne jingïakhun ka dei ruh ban khanglad ïa ka jingpyndonkam ïa u duma ha ki jaka paidbah, ka jingdie ha ki jaka paidbah bad khamtam hajan ki skul.
Na ka liang ki pulit ki la ïathuh ban a Wageasi OGC – la ïoh kumba 259 ki challan, ka kuna kaba T. 30,050, na Mendipathar WPS – 231 ki challan, T. 17,200 ka kuna, na Mendipathar PS – 218 ki challan, T. 31,600 ka kuna na Rari OGC – 198 ki challan, ka kuna kaba T. 19,750.
Halor kane na ka liang Superintendent of Police, North Garo Hills, u la kynthoh ba kane kadei ka kam kaba la aiti da ki ophisar ha baroh ki stations.
“Ka kam jong ngi kam dei eh tang ban pyntreikam ïa ki aiñ hynrei ban ïada ïa ki jingim. Manla ki challan ki pyni ïa ki kam ba ngi kwah ban pynlong ïa ka district jong ngi kaba don ka lad jingïada bad ka koit ka khiah jong baroh,” bynrap SP.
Ïa kane ka jingïalap la kyrshan lang da ka National Tobacco Control Programme (NTCP) hapoh ka tnat Health & Family Welfare, NHM Meghalaya, bad kiwei pat ki lad ki lynti khamtam ha kaba ïadei bad ki khynnah skul.
Na ka liang Dr. Nabneeta D. Mawrie, State Nodal Officer ka NTCP Meghalaya, la ïaroh ïa kane ka kam ba la shim da ki pulit naba u duma u dei uwei na ki daw jong ka jingpang bympong. La ong ruh ba ka North Garo Hills’ ka la dei kawei na ki nuksa napdeng kiwei pat ki district.
Halor kane ka kam, uwei na kiba shong dukan ha Resubelpara u la ong, “Mynta ngi la ïohi ba ki la don tang khyndiat ngut eh kiba dih duma ha ki jaka ïew bad kane kan long kaba bha eh na ka bynta ka jingkoit jingkhiah ki khun ki kti jong ngi.”
