Khliehriat, Rymphang, 21: Ki briew ki bym lah satia ban ithuh durkhmat ki la rung jubor ha ki ar tylli ki Polling Station, kata, ha Wapung-A bad Wapung-B ha shnong Wapungskur, East Jaiñtia Hills District kiba hap hapoh hapoh ka Musniang-Rangad Constituency, ha Bataw A bad ha Bataw B kiba hap hapoh ka Bataw-Lakadong Constituency.
Katkum ka jingïathuh jong ka Additional Deputy Commissioner (ADC) ka East Jaiñtia Hills ka Kong Jacquiline U Kharpuri kaba long ruh ka Returning Officer, katba ka jingthep vote ka dang ïaid shaid shaid ha ki ar tylli ki Polling Station kiba don ha shnong Wapungskur, kyndit kynsan ha ka por kumba 11.30 baje mynstep ki la don ki briew ki bym lah ban ithuh ki la rung jubor hapoh ki Polling Station bad ki la pynpait lut ïa ki EVM.
Ïa ka jingthep vote ha kine ki ar tylli ki Polling Station la hap ban pynsangeh noh namar ka jingshah thombor.
U Mawphor tang shu ïoh jingtip u la hiar sha ka shnong Wapungskur ha kaba la lap ba ki kamra ba don ki EVM ki la shhah pynjulor bad ki kot ki sla ki la satah lut ha madan bad wat ïa ki miej ki shuki ruh ba shong ki Polling Agent bad ki Presiding Officer ruh la pynkylla khongpong haduh bym ithuh ithaw shuh.
La lap ba ki paidbah nongthep vote kim don shuh ha ki Polling Station bad ki la phet lut sha la ïing bad la sngewthuh ba ka don ka jingtieng bad ka jingsngew syier jong ki paidbah ha ka shnong Wapungskur hadien ba la mih ka huri hura kaba jur.
Ka thymmei khubor, ka ïathuh ruh ba ki la don katto katne kiba la mynsaw ruh malu mala ha kane ka jingjia.
U Deputy Commissioner jong ka East Jaiñtia Hills District, u Shivansh Awashi bad u Superintendent of Police u Giri Prasad, Dy.SP Bah S.Pasleiñ bad ki Returning Officer ba kynthup ïa ka Kong Jacqueline. U.Kharpuri bad u Bah G.Warjri kiba dei ruh ki Additional Deputy Commissioner jong ka East Jaiñtia Hills District ki la leit mar mar sha ka shnong Wapungskur ban jurip ïa kane ka jingjia.
Haba kren sha ki pathai khubor, ka Kong Jacqueline ka ong, “ha ki jaka thep vote ha Wapungskur baroh ki la ïaid beit ha ka por mynstep watla ka la don ka jingïasngewthuh bakla khyndiat ha ka por mynstep hynrei la ïa pynbeit noh bad ki kam ki la ïaid beit haduh ka por 11.20 mynstep hynrei ha ka por 11.35 baje mynstep ngi la ïoh jingtip ba ka la don ka jingrung jubor jong ki briew ki bym lah ban ithuh durkhmat namarba ki Polling Officer bad ki Polling Agent, ki Zonal Officer, Presiding Officer ruh kiba don hapoh ka kamra kim ithuh ïa kita ki briew bad kita ki briew ki la rung da ka bor bad pynpait pynpra ïa ki EVM bad pynduh lut ïa ki kam kiba dei ban leh na ka bynta ka election.”
“Kane kajuh ka kynhun ha ka por 11.37 baje ki la leit pat sha sha kawei ka polling station jong ki shynrang ban thombor bad ban pynpait lut ïa ki EVM. Wat haba ki paidbah nongshong shnong ki la pyrshang ban pynjai jai tangba kim lah satia ban leh eiei” ong ka Kong Kharpuri.
Ka la ong ruh ba sa tang na ka liang jong ka shnong kaba lah ban leh eiei namarba na ka liang ki kynhun ba pynïaid ïa ka jingthep vote kim lah satia ban ithuh satia ïa ki briew kiba rung jubor ha ki jaka ba thep vote.
Ha ka shnong Bataw ka kynhun jong ki briew bym lah ban ithuh durkhmat ki la rung jubor ha Polling Station bad pynpait ïa ki EVM.
U Mawphor ha ka jingjurip, u la lap ba ki ar tylli ki Polling Station ha shnong Bataw ki ïaid beit bha ha ka por mynstep hynrei ym lah pat ban tip na kaei ka daw shu kynsan kynsan ha ka por da ladep thep vote ha ka por nohphai sngi shi kynhun ki briew bym lah ithuh ki la rung jubor bad pynpait ïa ki EVM.
Watla ki EVM kim pat da julor haduh katta katta kumba long ha Wapungskur, hynrei ki bor ba dei peit ki la rai ban pynlong noh da kawei ka jingthep Vote ha ka shnong Bataw.
U Superintendent of Police ka East Jaiñtia Hills District u Giri Prasad u la ïathuh ba tang shu ïoh jingtip ïa ka jinghuri hura u la bthah ïa ki bor Pulit ba ki dei ban peit bha ba ki paidbah kin lait na kino kino ki jingmynsaw bad da lade hi u la hiar mar mar sha Wapungskur bad hadien katto katne la wan poi ruh sa u DyIG Eastern Range, u Davis.N.Marak.
Halor kine ki jingjia ha Wapungskur bad ha Bataw ka tnat Pulit ka la ujor ejahar bad register case. Ka jingtohkit ban ïohkem ïa kiba donkti ka dang ïaid shakhmat.
